سیریز کے اختتام پر کھلاڑیوں کے مستقبل کا فیصلہ ہوگا:آرتھر
لیڈز: پاکستان کرکٹ ٹیم کے ہیڈ کوچ مکی آرتھر نے کھلاڑیوں کو مستقبل کے حوالے سے واضح کیا ہے کہ انگلینڈ سے سیریز کے اختتام پر اس بات کا فیصلہ ہوگا کہ کون ٹیم کے ساتھ چل سکتا ہے اور کون نہیں۔
انگلینڈ نے گذشتہ روز کھیلے گئے ایک روزہ میچ میں پاکستان کے خلاف 4 وکٹوں سے فتح کے ساتھ سیریز میں 0-4 کی برتری حاصل کرلی، جب کہ مسلسل شکست کی وجہ سے پاکستان کا 2019 کے ورلڈ کپ میں براہ راست کوالیفائی کرنا خطرے میں پڑ گیا ہے۔
اس سیریز کے آغاز پر انٹرنیشنل کرکٹ کونسل (آئی سی سی) ایک روزہ کرکٹ کی رینکنگ میں پاکستان کا نمبر نواں تھا۔
خبر رساں ادارے اے ایف پی کے مطابق مکی آرتھر کا کہنا تھا، 'مجھے اس جملے سے نفرت ہے، لیکن ہم دنیا میں نویں نمبر پر ہیں اور ہمیں معلوم ہے کہ اس کی وجہ کیا ہے'۔
مزید پڑھیں:انگلینڈ کی پاکستان کو مسلسل چوتھی شکست
پاکستان اپنی انٹرنیشنل رینکنگ بہتر بنانے کی کوشش کررہا ہے، جبکہ اس سلسلے میں آئی سی سی سسٹم کا کردار بھی اہم ہے جو حریف ٹیموں کے معیار کے حوالے سے بھی درجہ بندی کرتا ہے۔
اس حوالے سے مکی آرتھر کا کہنا تھا،' میں نے فکسچر لسٹ دیکھی ہے، گیم بالکل بھی آسان نہیں ہے'۔
واضح رہے کہ پاکستان اگلے برس برطانیہ میں ہونے والی چیمپیئنز ٹرافی 'دی منی ورلڈ کپ' کے لیے کوالیفائی کرچکا ہے۔
مکی آرتھر کا کہنا تھا پاکستان کو ورلڈکپ سے قبل ویسٹ انڈیز کے خلاف 2 سیریز کھیلنی ہیں جس میں اچھے کھیل کا مظاہرہ کرنا ہوگا۔
اسی دوران ہم نے آسٹریلیا میں ایک روزہ سیریز بھی کھیلنی ہے جو واقعی مشکل ہوگی۔
پاکستانی کوچ نے کھلاڑیوں کو وارننگ دی کہ ٹور کے اختتام پر فیصلہ ہو گا کہ ہمیں کسے ساتھ لے کر چلنا ہے اور کسے نہیں۔
ان کا کہنا تھا کہ انگلش ٹیم ایک زبردست ٹیم ہے، ان کے پاس شاندار کھلاڑی ہیں، لیکن ہمارے 15 رکنی اسکواڈ میں فی الوقت ایسے پلیئرز نہیں ہیں۔
واضح رہے کہ انگلینڈ نے پاکستان کو سیریز کے پہلے میچ میں ڈک ورتھ لوئس میتھڈ کے تحت44 رنز سے شکست دی تھی جب کہ انگلش ٹیم نے دوسرے میچ میں 4 وکٹوں سے کامیابی حاصل کی تھی۔ پاکستان کو تیسرے میچ میں 169 رنز شکست ہوئی جب کہ انگلینڈ نے چوتھا میچ بھی باآسانی 4 وکٹوں سے اپنے نام کیا۔
لائیو ٹی وی