'رینجرز کے 1992 آپریشنز ،446 ٹارگٹ کلرز گرفتار'
کراچی: سندھ رینجرز نے سال 2016 میں مختلف کارروائیوں اور آپریشنز کے دوران سیاسی پارٹیوں کے عسکری ونگز سے تعلق رکھنے والے ٹارگٹ کلرز سمیت 446 ٹارگٹ کلرز کو گرفتار کیا۔
سال کے اختام پر رینجرز کی جانب سے جاری کردہ رپورٹ کے مطابق سندھ رینجرز نے اپنی توجہ کراچی آپریشن پرمرکوز رکھتے ہوئے سال بھر میں شہر کے اندر 1992 آپریشنز کیے،جن کے دوران 2 ہزار 847 مشتبہ ملزمان کو حراست میں لیا گیا۔
رپورٹ کے مطابق کارروائیوں کے دوران 446 ٹارگٹ کلرز کو بھی گرفتار کیا گیا، جن میں سے 348 قاتلوں کا تعلق مختلف سیاسی جماعتوں کے عسکری ونگز سے ہے جب کہ 87 ٹارگٹ کلرز کا تعلق لیاری گینگ وار اور 11 کا تعلق مختلف فرقہ وارانہ فسادات میں ملوث گروپوں سے ہے۔
رینجرز کی جانب سے جاری کردہ بیان کے مطابق اغوا برائے تاوان میں ملوث 26 ملزمان کو گرفتار کرکے 13 مغویوں کو باحفاظت بازیاب کرایا گیا۔
یہ بھی پڑھیں: کراچی آپریشن: 31336 ملزمان گرفتار
رینجرز کی رپورٹ میں شہر میں ٹارگٹ کلنگ کے واقعات میں نمایاں طور پر کمی ہونے کا دعویٰ کرتے ہوئے بتایا گیا ہے کہ رواں برس 87 افراد کو قتل کیا گیا جب کہ گزشتہ برس ٹارگٹ کلنگ کا نشانہ بنائے جانے والے افراد کی تعداد 199 تھی۔
رپورٹ کے مطابق رینجرز نے مختلف کارروائیوں کے دوران بڑی تعداد میں اسلحہ بھی برآمد کیا، رینجرز نے آپریشنز اور چھاپوں کے دوران 1845 پسٹل، مشین گنز، لائٹ مشین گنز، سب مشین گنز، ڈیٹونیٹرز، لانچرز اور ریوالورز سمیت دھماکہ خیز مواد بھی برآمد کیے۔
رپورٹ میں بتایا گیا کہ سال بھر میں ایک لاکھ 94 ہزار 579 مختلف نوعیت کی گولیوں کے راؤنڈز بھی برآمد کیے گئے۔
کراچی آپریشن پر مختصر نظر
پیراملٹری فورس رینجرز نے کراچی میں ستمبر 2013 میں ٹارگٹڈ آپریشن شروع کیا جو تاحال جاری ہے، رینجرز کی کارروائیوں اور آپریشنز کے نتیجے میں جرائم میں کسی حد تک کمی دیکھنے میں آئی مگر تاحال شہر میں جرائم پر مکمل طور پر قابو نہیں پایا جا سکا۔
کراچی آپریشن کے بعد صوبائی حکومت کی جانب سے سندھ رینجرز کو خصوصی اختیارات دیئے گئے تھے، جن کی مدت میں مسلسل اضافہ کیا جاتا رہا، اب بھی رینجرز خصوصی اختیارات کے تحت ہی شہر میں کارروائیاں جاری رکھے ہوئے ہے۔
رواں برس اگست میں رینجرز کو اختیارات دینے کے معاملے پر سندھ حکومت اور وفاقی حکومت میں کشیدگی دیکھنے میں آئی مگر سندھ کے وزیراعلیٰ سید مراد علی شاہ نے عہدہ سنبھالنے کے بعد رینجرز کے اختیارات میں اضافہ کیا۔
مزید پڑھیں: 'کراچی آپریشن مکمل طور پر غیر سیاسی ہے'
گزشتہ 3 سال سے شہر میں جاری رینجرز آپریشن میں رواں سال تیزی ہوئی، جس سے کئی خاطر خواہ نتائج بھی برآمد ہوئے۔
گزشتہ برس کے وسط میں رینجرز نے کراچی آپریشن پر اپنی بریفنگ میں دعویٰ کیا تھا کہ آپریشن کے نتیجے میں دہشت گردی کے واقعات میں 60 اور ڈکیتی کی وارداتوں میں 65 فیصد جبکہ بھتہ خوری میں 70 فیصد کمی آئی۔
بریفنگ میں بتایا گیا تھا کہ آپریشن کے دوران سال 2015 کے اگست تک 913 دہشت گرد اور 550 ٹارگٹ کلرز گرفتار کیے گئے جبکہ 15 ہزار 400 غیرقانونی ہتھیار بھی برآمد کیے گئے۔
بریفنگ میں رینجرز کے افسر کرنل امجد کا کہنا تھا کہ جرائم پیشہ عناصر کے خلاف لڑتے ہوئے رینجرز کے 23 جوان شہید اور 85 زخمی ہوئے۔
حکام کا کہنا تھا کہ 2015 میں کاریں چھیننے کے واقعات میں کمی آئی مگر موٹر سائیکلوں کی چوری اور چھینا جھپٹی میں اضافہ ہوا۔
لائیو ٹی وی