کیپٹن کرنل شیر خان شہید (نشانِ حیدر) کے 26ویں یومِ شہادت پر مساجد میں قرآن خوانی اور دعاؤں کا اہتمام کیا جارہا ہے۔

ڈان نیوز کے مطابق آج کیپٹن کرنل شیر خان شہید کا یومِ شہادت پوری عقیدت اور احترام سے منایا جا رہا ہے، دن کا آغاز مساجد میں قرآن خوانی اور دعاؤں کے ساتھ ہوا، علمائے کرام نے شہید کے درجات کی سربلندی کے لیے خصوصی دعاؤں کا اہتمام کیا۔

علمائے کرام نے اظہارِ خیال کرتے ہوئے کہا کہ وطن کی حفاظت کی خاطر جانوں کا نذرانہ پیش کرنے والے پاک فوج کے جوان عزت و احترام کے مستحق ہیں، شہدا کا لہو ہم پر قرض ہے، پاکستان کے شہدا کی عظیم قربانیوں کی بدولت آج ہمارا ملک قائم و دائم ہے، زندہ قومیں اپنے محسنوں کے احسانات کو فراموش نہیں کرتیں۔

علمائے کرام کا کہنا تھا کہ جو قومیں اپنے شہدا کی تکریم نہیں کرتیں وہ ذلیل و رسوا ہو جاتی ہیں، شہید ہمیشہ زندہ ہوتے ہیں، کیپٹن کرنل شیر خان شہید قوم کا بہادر بیٹا تھا جو ہمیشہ ہر دل میں زندہ رہے گا۔

کرنل شیر خان کی بہادری یاد رکھی جائے گی، وزیراعظم

وزیراعظم شہباز شریف نے کہا کہ کیپٹن کرنل شیرخان شہید نے وطن سے وفاداری، فرض شناسی اور وطن کے دفاع کے لیے جان کی پرواہ کیے بغیر لڑنے کی ایسی مثال قائم کی جو رہتی دنیا تک یاد رکھی جائے گی۔

انہوں نے کہا کہ کیپٹن کرنل شیر خان شہید نے کارگل کے محاذ پر بے مثال بہادری، جرات اور شجاعت کا مظاہرہ کیا، جس کی دشمن بھی تعریف کیے بغیر نہیں رہ سکا۔

ان کا کہنا تھا کہ کیپٹن کرنل شیر خان شہید نشان حیدر اور ان کے اہلِ خانہ پوری قوم کے لیے قابل فخر ہیں، پوری قوم پاک فوج کے جوانوں کے ملک کی حفاظت کے غیر متزلزل عزم کو سلام پیش کرتی ہے، افواج پاکستان کی اس ملک کے دفاع کی خاطر لازوال قربانیاں ہیں۔

افواج پاکستان کا بھی شہید کو خراج عقیدت

مسلح افواج اور پوری قوم نے کارگل جنگ کے ہیرو کیپٹن کرنل شیر خان شہید نشانِ حیدر کو ان کے 26ویں یومِ شہادت پر شاندار خراجِ عقیدت پیش کیا ہے۔

پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر، چیئرمین جوائنٹ چیفس آف اسٹاف کمیٹی، چیف آف ایئر اسٹاف، چیف آف نیول اسٹاف اور اعلیٰ عسکری قیادت نے کیپٹن کرنل شیر خان شہید کی عظیم قربانی کو سلام پیش کیا ہے۔

آئی ایس پی آر کے مطابق کارگل کی جنگ کے دوران شہید کیپٹن کرنل شیر خان نے غیر معمولی دلیری، جوانمردی اور شجاعت کا مظاہرہ کرتے ہوئے اپنی جان مادرِ وطن پر قربان کی، ان کا کردار پاک فوج کی اعلیٰ پیشہ ورانہ روایات کا عملی مظہر ہے۔

شہید نے دشمن کے حملوں کا مردانہ وار مقابلہ کرتے ہوئے دفاعِ وطن کے لیے اپنی جان کا نذرانہ دیا، اُن کا جذبہ ایثار، وفاداری، جرأت اور فرض شناسی آنے والی نسلوں کے لیے ایک درخشاں مثال اور مشعلِ راہ ہے۔

مسلح افواج نے اس موقع پر اس عزم کا اعادہ کیا کہ وطن عزیز کے دفاع اور قومی حمیت کے تحفظ کے لیے ہر ممکن قربانی دی جائے گی، کیپٹن شیر خان شہید جیسے قومی ہیروز کی قربانیاں ہمارے حوصلوں کو بلند رکھتی ہیں اور پوری قوم کو ان پر فخر ہے۔