سپریم کورٹ: پی آئی اے کو جعلی ڈگری والوں کے خلاف کارروائی جاری رکھنے کی ہدایت
سپریم کورٹ کی کراچی رجسٹری نے پاکستان انٹرنیشنل ایئرلائنز (پی آئی اے) میں جعلی ڈگری پر ملازمت سے برطرفی کے معاملے پر سندھ ہائی کورٹ کا جاری کردہ حکم امتناع ختم کردیا۔
سپریم کورٹ کی کراچی رجسٹری میں پی آئی اے میں جعلی ڈگری پر ملازمت سے برطرفی کے معاملے پر حکم امتناع کے خلاف وفاقی حکومت کی اپیل پر سماعت ہوئی۔
عدالت نے سندھ ہائی کورٹ کا جاری کردہ حکم امتناع ختم کردیا، عدالت نے پی آئی اے کو محکمہ جاتی کارروائی جاری رکھنے کی ہدایت کردی۔
چیف جسٹس یحییٰ آفریدی نے ریمارکس دیتے ہوئے کہا کہ 10 برس سے ملازمین حکم امتناع پر چل رہے ہیں، ایسا نہیں ہوسکتا، حکم امتناع واپس لے رہے ہیں اور اپنے کیس کی تیاری کریں۔
ایڈیشنل اٹارنی جنرل محسن شاہوانی نے کہا کہ ندیم لودھی جعلی ڈگری پر ایسوسی ایٹ انجینئر بھرتی ہوا تھا، ڈگری جعلی ثابت ہونے پر پی آئی اے نے شوکاز نوٹس جاری کرکے ملازمت سے برطرف کردیا تھا، ندیم لودھی حکم امتناع کے دوران ترقی پاکر آفیسر گریڈ کے گروپ 6 تک پہنچ گئے تھے۔
ندیم لودھی نے 2015 میں ہائی کورٹ سے حکم امتناع حاصل کیا تھا، وفاقی حکومت نے سندھ ہائی کورٹ کے حکم امتناع کے خلاف سپریم کورٹ میں اپیل دائر کی تھی۔
لائیو ٹی وی