علمِ نجوم کے مطابق زمین، چاند، سورج اور ستاروں کی کسی کے پیدائش کے وقت پوزیشن شخصیت پر بہت زیادہ اثرانداز ہوتی ہے اور ان کو دیکھ کر اس علم کے ماہرین لوگوں کی عادات و فطرت کے بارے میں پیشگوئیاں کرتے ہیں مگر کیا آپ کو معلوم ہے کہ آئسکریم کے مختلف ذائقوں کی پسند بھی یہ راز افشاء کرسکتے ہیں؟

جی ہاں ایسا واقعی ہوتا ہے یعنی آپ کے پسندیدہ آئس کریم فلیور آپ کی شخصیت کے کچھ گوشے سامنے لے ہی آتے ہیں تو جانے کہ آپ کا پسندیدہ ذائقہ آپ کی شخصیت کے بارے میں کیا کہتا ہے۔

ونیلا کے شائقین من موجی یا مضطرب فطرت کے حامل ہوتے ہیں

کریٹیو کامنز فوٹو

ونیلا آئس کریم کے سادہ ترین فلیورز میں سے ایک ہے مگر اس کو پسند کرنے والے درحقیقت رنگارنگ، من موجی، مثالیت پسند، خطرات مول لینے اور منطق کی بجائے اپنے وجدان پر انحصار کرنے والے ہوتے ہیں۔ شکاگو کے اسمیل اینڈ ٹیسٹ ٹریٹمنٹ اینڈ ریسرچ فاﺅنڈیشن کے ڈاکٹر ایلن ہرسچ کی مطابق ونیلا آئس کریم کو پسند کرنے والے جذباتی اور قریبی رشتوں کو نبھانے میں کامیاب رہتے ہیں۔ دلچسپ بات یہ ہے کہ آئس کریم کے پسندیدہ ذائقہ بچپن میں ہی لوگوں کے ذہن میں بس جاتا ہے اور پوری زندگی وہ پسند برقرار رہتی ہے۔

اسٹرابری کے شوقین اپنے آپ میں گم رہتے ہیں

کریٹیو کامنز فوٹو

ڈاکٹر ایلن کی ہی تحقیق کے مطابق اسٹرابری فلیور کو پسند کرنے والے اکثر متحمل مزاج، مخلص اور اپنے آپ میں گم رہنے والے ہوتے ہیں۔ اس کے علاوہ اس ذائقے کو ترجیح دینے والے منطقی سوچ اور صاحب فکر ہوتے ہیں۔

چاکلیٹ لورز عاشقانہ مزاج کے حامل ہوتے ہیں

کریٹیو کامنز فوٹو

اگر تو آپ چاکلیٹ اسکوپ کو ترجیح دیتے ہیں تو ڈاکٹر ایلن کی تحقیق میں ایسے افراد کو عاشقانہ مزاج اور دیگر کو بہکانے والی فطرت کا حامل قرار دیا گیا ہے، تاہم یہ لوگ زندہ دل، پرکشش، ڈرامائی انداز کے دلدادہ اور کئی مواقعوں پر آسانی سے بیوقوف بھی بن جاتے ہیں۔

کافی فلیور کے شائقین ڈرامائی شخصیت کے مالک

کریٹیو کامنز فوٹو

اگر آپ زندہ دل، ڈراما پسند اور زندگی میں ہوش پر جوش کو ترجیح دیتے ہیں تو ممکنہ طور پر آپ کافی آئس کریم کے پرستار ہوں گے۔ تحقیق کے مطابق کافی آئسکریم کو ترجیح دینے والوں کو مستقبل کی پروا نہیں ہوتی اور وہ حال ہی میں مگن رہتے ہیں۔ انہیں کسی بھی رومانوی تعلق میں ہر وقت ہنگامے کی ضرورت محسوس ہوتی ہے۔

چاکلیٹ چپ کے پرستار سخی دل ہوتے ہیں

کریٹیو کامنز فوٹو

اگر آپ ہمیشہ کلاسیک چاکلیٹ چپ آئسکریم کو پسند کرتے ہیں تو یقیناً سخی دل، اپنے کام کے ماہر اور نت نئے شعبوں میں کوشش کرنے سے نہ گھبرانے والی شخصیت کے مالک ہوں گے۔

راکی روڈ فلیور کو چاہنے والے ہوتے ہیں جارحیت پسند

کریٹیو کامنز فوٹو

اگر چاکلیٹ، نٹس اور مارش میلو کے امتزاج سے سجا فلیور آپ کا پسندیدہ ہے تو زیادہ امکان ہے کہ آپ جارحیت پسند اور دل موہ لینے والی شخصیت کے مالک ہوں گے جو دیگر افراد کی بات پورے تحمل سے سنتا ہو۔۔ ڈاکٹر ایلن کے مطابق ایسے افراد اگر کوئی مقصد طے کرلیں تو اس میں اکثر کامیاب بھی رہتے ہیں تاہم ان کا جارحانہ رویہ ان کے ارگرد کے لوگوں کے دلوں کو ٹھیس بھی پہنچا دیتا ہے۔