لاہور: مشہور ڈی جے بٹ نے گزشتہ سال اسلام آباد میں طویل دھرنے کے دوران اپنی خدمات کا پورا معاوضہ نہ ملنے پر پاکستان تحریک انصاف کے خلاف قانونی کارروائی کی دھمکی دے دی۔

پیر کے روزڈان نیوز کو حاصل ہونےوالی ڈی جے بٹ کی ای میل سے معلوم ہوتا ہے کہ پی ٹی آئی سے معاہدہ کے تحت انہیں اپنی خدمات کا تیرہ کروڑ روپے معاوضہ ملنا تھا ، تاہم ’رعایت‘ کرتے ہوئےاسے 11 کروڑ روپے کر دیا گیا۔

بٹ کا دعوی ہے کہ دھرنے کے دوران انہیں چھ کروڑ ادا کر دیے گئے اور پارٹی نے انہیں مزید پانچ کروڑ روپے دینا ہے۔

دلچسپ بات یہ ہے کہ گزشتہ سال بٹ نے اپنی خدمات کے عوض پی ٹی آئی سے کوئی پیسہ نہ لینے کا اعلان کیا تھا۔

اُس وقت بٹ نے کہا تھا’بطور ساؤنڈ انجینئر میں نے 30اگست تک 35000 ہزار روپے فی دن معاوضہ لیا، لیکن پولیس کےپی ٹی آئی اور پی اے ٹی کارکنوں کے درمیان جھڑپوں نے بعد میں نے پی ٹی آئی سے مزید معاوضہ لینے سے منع کر دیا‘۔

بٹ کے مطابق ان کے اس فیصلے کی وجہ یہ ہے کہ اب وہ بھی اس دھرنے کا حصہ بن چکے ہیں۔

ڈی جے بٹ کے نام سے مشہور محمد آصف نے دھرنے کے دوران ساؤنڈ سسٹم، لائٹس، جنریٹر اور بیک اپ جنریٹر فراہم کیے تھے۔

پی ٹی آئی کا ردعمل

پارٹی نے اپنے ردعمل میں کہا کہ بل اتنا زیادہ نہیں جتنا ڈی جے بٹ دعوی کر رہے ہیں۔ پارٹی کا کہنا ہے کہ ان کی دو رکنی ٹیم معاملہ کا جائزہ لے رہی ہے۔

پی ٹی آئی چیئرمین عمران خان نے چیف آ ف سٹاف نعیم الحق نے ڈی جے بٹ کو اسلام آباد ملاقات کے لئے بلا لیا۔ ان کا کہنا ہے کہ معاملہ جلد ہی حل کر لیا جائے گا۔