امریکا کی پاکستان سے داعش مخالف نئے اتحاد پر مشاورت
امریکا نے داعش کے بڑھتے ہوئے خطرے پر قابو پانے کے لیے ایک نئے فوجی اتحاد کی تشکیل پر پاکستان کو اعتماد میں لیا ہے۔
'ساحل سے جنوبی ایشیاء' نامی اس نئے فوجی اتحاد کا اعلان جلد وائٹ ہاؤس کی جانب سے متوقع ہے۔
ڈان نیوز کے مطابق ایک اعلیٰ پاکستانی عہدیدار نے بتایا کہ امریکا نے اعلیٰ سطح پر فوجی اتحاد کے معاملے پر پاکستان سے مشاورت کی ہے ۔
اس کا مزید کہنا تھا کہ پاکستان اتحاد میں شامل ہونے کے حوالے سے فیصلہ تمام اسٹیک ہولڈرسے مشاورت کے بعد کرے گا۔
عہدیدار کا کہنا تھا ' داعش افغانستان میں موجود ہے اور وہ مقامی عسکریت پسند تنظیموں سے رابطے بڑھا رہی ہے، اگر ہم نے اس کا سامنا نہ کیا تو یہ پاکستان کی سیکیورٹی کے لیے خطرہ بن سکتی ہے'۔
عہدیدار کا مزید کہنا تھا کہ اس حوالے سے مزید تفصیلات پاکستان اور امریکا کے درمیان فوجی سطح پر اس وقت طے کی جائیں گی جب اس اتحاد کو عوام کے سامنے لایا جائے گا۔
رواں برس فروری نے داعش کی پاکستان میں سرگرمیوں کے حوالے سے اپنی خاموشی توڑتے ہوئے اعتراف کیا تھا کہ یہ عسکریت پسند گروپ ملک کے لیے ایک 'سنگین خطرہ' ہے۔
تبصرے (2) بند ہیں