بلاول کے پروٹوکول نے ننھی بچی کی جان لے لی

ویب ڈیسک شائع December 23, 2015

واٹس ایپ چینل

کراچی: شہرِ قائد میں وی وی آئی پی شخصیات کے پروٹوکول نے مبینہ طور پر 10 ماہ کی بسمہ کی جان لے لی.

لیاری کی رہائشی بچی بسمہ کے والد فیصل نے الزام عائد کیا کہ سول ہسپتال میں پاکستان پیپلزپارٹی (پی پی پی) کے چیئرمین بلاول بھٹو اور وزیراعلیٰ سندھ قائم علی شاہ کی آمد کے موقع پر وی وی آئی پی پروٹوکول کے باعث ان کی 10 ماہ کی بیٹی کو بروقت طبی امداد نہ مل سکی اور وہ دَم توڑ گئی۔

واضح رہے کہ سول ہسپتال کے بے نظیرٹراما سینٹر میں بلاول بھٹو اور وزیراعلیٰ سندھ کی آمد پر سخت سیکیورٹی انتظامات کیے گئے تھے، ہسپتال کے دونوں دروازے بند کردیئے گئے جبکہ مریضوں کے ساتھ ساتھ ایمبولینسوں کو بھی آنے کی اجازت نہیں دی گئی۔

پروٹوکول کے سبب بچی کے والدین ایک گھنٹے تک ٹریفک میں پھنسے رہے، بعد ازاں انھوں نے بچی کو ایمرجنسی وارڈ میں منتقل کرنے کی درخواست کی لیکن پروٹوکول افسران نے انھیں ہسپتال میں جانے نہیں دیا۔

جس کی وجہ سے 10 ماہ کی بسمہ کو بروقت طبی امداد نہیں مل سکی اور بچی نے ہسپتال کے دروازے پر اپنے والد کی گود میں ہی دَم توڑ دیا۔

ڈاکٹروں کے مطابق اگر بچی کو بروقت ہسپتال لایا جاتا تو اس کی جان بچائی جاسکتی تھی۔

بچی کے والد کا کہنا تھا کہ انھوں نے ہمیشہ پیپلز پارٹی کو ووٹ دیا لیکن انھیں اس کا اجر مل گیا۔

اہلخانہ کے مطابق پیپلز پارٹی کا نعرہ 'روٹی، کپڑا اور مکان' ہے، لیکن غریبوں کی جماعت کہلانے والی اس جماعت کے لیڈر کے پروٹوکول کی وجہ سے ایک معصوم بچی کی جان چلی گئی۔

بچی کی ہلاکت کے بعد پیپلز پارٹی کے سینیئر رہنما اور صوبائی وزیر تعلیم نثار کھوڑو نے بسمہ کے والدین سے تعزیت اور ہمدردی کا اظہار کرتے ہوئے کہا کہ پروٹول کی وجہ سے بچی کی جان جانے کا انھیں دکھ ہے۔

بلاول ہاؤس کی تردید

10 ماہ کی بچی کی ہلاکت پر بلاول ہاؤس کی جانب سے جاری کیے گئے بیان میں کہا گیا کہ بلاول بھٹو زرداری نے 15 سے 20 منٹ کے دوران ٹراما سینٹر کا دورہ کیا، افتتاح کیا اور واپس چلے گئے، اس دوران کوئی ٹریفک جام یا پروٹوکول نہیں تھا۔

بلاول کا انکوائری کا حکم

بلاول بھٹو زرداری نے 10 ماہ کی بسمہ کی ہلاکت کا نوٹس لے لیا اور سندھ حکومت کو واقعے کی غیر جانبدار انکوائری کا حکم دیا۔

آصف زرداری نے نوٹس لے لیا

پیپلز پارٹی کے شریک چیئرمین اور سابق صدر آصف علی زرداری نے بھی پروٹوکول کے دوران بچی کی ہلاکت کا نوٹس لے لیا۔

آصف زرداری نے وزیراعلیٰ سندھ قائم علی شاہ کو ٹیلی فون کیا اور واقعے کی فوری تحقیقات کی ہدایت کردی۔

پی پی پی کے شریک چیئرمین کا کہنا تھا کہ سندھ کے ہر شہری کی زندگی ہمارے لیے اہم ہے۔

آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں.

واٹس ایپ چینل

تبصرے (8) بند ہیں

Haider Shah Dec 23, 2015 04:20pm

Statement from "Bilawal House" speak it self. What a ruthlessness of sick mentality, intoxication of power and money have prevented to think straight. What else you called it? Zinda Ha Bhutto?

Israr Muhammad Khan Yousafzai of Shewa Dec 23, 2015 05:35pm

افسوسناک وقعہ ھے قابل مزمت ھے لیکن ٹی وی پر بیٹھے اینکرز اور سیاستدان اس پر سیاست نہ کریں بچی مری ھے ھمیں کسی پر اعتراض کی بجائے پروٹوکول کلچر کو ختم کرنا ھوگا اسکے لئے ملک میں امن وامان لانا ضروری ھے بغیر امن اسکا خاتمہ ناممکن ھے پی ٹی ائی والے یہ بھولیں کہ انکی جلسوں میں اسی پروٹوکول کی وجہ سے بہت سے لوگ مرے تھے ملتان میں والدین کیلئے بچوں کا عم بہت بڑا ھوتا ھے لیکن کراچی کے واقعے میں لوگ محول بنارہے ھیں اگر وہ بچے کو پہلے پیدل ہسپتال لے جاتے تو ان کی جان بچ سکتی تھی

Kamal KSA Dec 23, 2015 06:04pm

I have no words to express the deepest pain and grievance caused, while looking at a desperate father, who is running to save his loving daughter. Our filthy politicians are the biggest liability of my great country and they should not wait for the moment, when this happens to them. Please behave humanly for a common person's welfare.

Dr.Afzaal Malik Dec 23, 2015 06:50pm

کینیڈا جیسے ترقی یافتہ ملک میں ریاست کا گورنر ایک عام آدمی کی طرح مارکیٹ میں گھوم پھر کر چیزیں خرید رہا ہوتا ہے۔ لوگ اسکےساتھ ہاتھ ملاتے اور اسکے ساتھ تصویریں کھچواتے ہیں۔ ہمارے ہاں پروٹوکول کے شوقین حکمرانوں کو اگر عوام سے اتنا ہی خوف ہے تو اپنے لئے علیحدہ پروٹوکول سڑکیں کیوں نہیں مختص کروا دیتے جہاں عوام کو جانے کی ضرورت ہی نہ پڑے۔ ہسپتالوں اور سکولوں تک جانے والی سڑکوں کو کلیئر ہونا چاہئےجہاں پروٹوکول کا نام بھی نہ ہو۔ جس ملک میں ایک معصوم بچی ہسپتال تک پہنچنے سے قبل ہی دم توڑ دے اُس ملک کے حکمرانوں سے آخرت میں تو پوچھ گچھ ہو گی ہی لیکن یہاں بھی اُن سے قصاص لیا جانا چاہئے۔ اُنکے خلاف معصوم جان جانے کے مقدمات درج ہونے چاہئیں۔

Dr.Afzaal Malik Dec 23, 2015 11:28pm

@Israr Muhammad Khan Yousafzai of Shewa وی آئی پی پروٹوکول کی وجہ سے سڑکیں بند ہوں تو گاڑی کی بجائے پیدل لے جائیں۔ اچھا مشورہ ہے ماشاء اللہ

Dr.Afzaal Malik Dec 23, 2015 11:30pm

Israr Muhammad Khan نے فرمایا ہے کہ بچے کو پیدل لے جاتے۔ اس حوالے سے ایک بات مشہور ہے کہ کسی گاڑی کے ڈرائیور نے کہا پٹرول ختم ہو گیا ہے آگے نہیں جا سکتی تو سردار جی نے کہا ٹھیک ہے واپس گھر لے چلو

﷽ثنا Dec 24, 2015 01:49am

جن کے ذہنوں سے غلامی نہیں گئی ہے یعنی غلام ابن غلام - وہ یہ مشورہ بالکل ٹھیک دے رہے ہیں کہ پیدل چلے جاتے مگر ان کو یہ نہیں پتا کہ جب لیڈر آتے ہیں تو پیدل جانے والے کو بھی دہشت گرد سمجھ کر ڈنڈے مارے جاتے ہیں -

Haider Shah Dec 24, 2015 07:35am

@Dr.Afzaal Malik, @Yousafzai of Shewa First apology not writing in Urdu as I don't have Urdu keyboard. Thought's to leave some thoughtful words for both Gent's "What you put, in your stomach will out your mouth" It applied to every one, so think about what our politician put in their stomach......