مقبول ترین میسجنگ میسنجر واٹس ایپ نے اپنی سالانہ فیس ختم کرنے کا فیصلہ کرلیا۔

خیال رہے کہ واٹس ایپ کی جانب سے صارفین سے سالانہ بنیادوں پر فیس لی جاتی ہے جو ایک ڈالر ہے۔

تاہم اب اس میسنجر کے بانی جان کوم نے ایک کانفرنس کے دوران انکشاف کیا کہ اس سروس کی سالانہ فیس کو ختم کرنے کا فیصلہ کیا گیا ہے۔

انہوں نے کہا کہ ایک ڈالر ویسے تو کوئی خاص نہیں مگر یہ چیز متعدد افراد کو یہ سروس استعمال کرنے سے روکتی ہے اور ایک عوامی میسجنگ سروس کے لیے اسے بالکل مفت کرنے کی ضرورت ہے۔

جان کوم نے اعتراف کیا کہ صارفین کے لیے رکاوٹ بننے کے لیے ساتھ ساتھ سال میں ایک دفعہ ادائیگی کی حکمت عملی صحیح طرح کام بھی نہیں کررہی کیونکہ اس کے نتیجے میں بیشتر افراد ایک سال بعد اس سروس کا استعمال ہی اچانک ختم کردیتے ہیں۔

اگر آپ نے واٹس ایپ استعمال کیا ہو تو سبسکرائپشن اسکرین سے بخوبی واقف ہوں گے۔

اچھی خبر یہ ہے کہ فیس کے خاتمے کا اطلاق آج سے ہوگیا ہے تاہم اس ایپ کے تمام ورژنز کے اسے پہنچنے میں ایک سے دو ہفتے لگ سکتے ہیں۔

بری خبر یہ ہے کہ اگر آپ نے گزشتہ روز ہی فیس ادا کی ہے تو وہ واپس ری فنڈ نہیں ہوگی۔

واٹس ایپ نے یہ بھی کہا ہے کہ سالانہ فیس ختم کرنے کا یہ مطلب نہیں کہ اب صارفین کو اشتہارات کا سامنا ہوگا۔

آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔