وکی پیڈیا کے سالانہ فوٹوگرافی مقابلے ’وکی لووز مونومنٹس 2016‘ میں تین پاکستانی فوٹوگرافرز کی تصاویر منتخب ہوگئیں۔

دنیا کے سب سے بڑے فوٹوگرافی کے اس مقابلے میں گذشتہ دو سالوں سے پاکستانی فوٹوگرافرز کی کامیابی کا سلسلہ جاری ہے۔

2016 کے اس مقابلے میں وکی لووز مونومنٹس کو 10ہزار 748 افراد کی جانب سے 2 لاکھ 77ہزار 365 تصاویر موصول ہوئیں جو کسی بھی تصویری مقابلے کے لیے جمع کرائی جانے والی تصاویر کی سب سے بڑی تعداد ہے۔

ان ہزاروں تصاویر میں سے پاکستانی فوٹوگرافرز کی 10 تصاویر نے بین الاقوامی اسٹیج تک رسائی حاصل کی۔

واضح رہے کہ کل شرکا میں سے مقابلے میں شریک پاکستانی فوٹوگرافرز کی تعداد 370 تھی جنہوں نے تقریباً اپنی 11 ہزار تصاویر کو مقابلے میں پیش کیا۔

وکی پیڈیا کی جانب سے منعقد کیے جانے والے اس مقابلے کا مقصد وکی پیڈیا کی ویب سائٹ پر موجود تاریخ و تہذیب کے موضوعات پر شامل مضامین میں تصاویر کو بہتر بنانا اور دنیا کے تاریخی مقامات کو محفوظ کرنا ہے۔