بولی وڈ میں پہلی مرتبہ قدم رکھنے والی اداکار ایلی اوارام نے کہا ہے کہ انہوں نے سلمان خان کی جانب سے شادی کی آفر کو کبھی بھی سنجیدگی سے نہیں لیا۔

ایلی ہندوستانی ٹی وی کے ریالٹی شو بگ باس میں شریک ہیں جس کے میزبان دبنگ خان ہیں۔

اس پروگرام میں متعدد بار اداکار نے انہیں شادی کی آفر کی تاہم ایلی کا کہنا ہے کہ وہ جانتی ہیں کہ سلمان بہت اچھی حس مزاح رکھتے ہیں اور فلرٹ کرنے میں بھی ان کا کوئی ثانی نہیں، اس لیے وہ سلمان کی آفر کو کافی انجوائے کرتی ہیں۔

ایلی نے منیش پال کے مدمقابل فلم 'مکی وائرس' سے بولی وڈ میں قدم رکھا ہے۔

ہندوستانی نژاد سویڈش اداکار کا کہنا تھا کہ شادی ایک بہت بڑی ذمہ داری ہے جس کو نبھانا ابھی ان کے بس کی بات نہیں کیونکہ وہ ابھی اپنی مکمل توجہ کام پر مرکوز کرنا چاہتی ہیں۔

ایلی کا کہنا تھا کہ انہیں بولی وڈ سے بہت سی آفرز ہو رہی ہیں تاہم وہ کرداروں کے انتخاب میں بہت احتیاط سے کام لے رہی ہیں۔

ویسے ایلی اور سلمان کے درمیان تعلقات کی خبریں کافی گرم ہیں لیکن سلمان تو اس معاملے پر بالکل خاموش ہیں تاہم ایلی نے یہ بیان دے کر اپنی پوزیشن واضح کرنے کی کوشش کی ہے۔