بیروت: جنوبی شام کی ایک مسجد میں ہونے والے دھماکے کے نتیجے میں شامی القاعدہ سے تعلق رکھنے والے النصرت فرنٹ کے 25 'باغی' ہلاک ہوگئے، جن میں تنظیم کا ایک اہم رہنما بھی شامل ہے۔

خبر رساں ادارے اے ایف پی نے شام میں انسانی حقوق کے لیے کام کرنے والے آبزرویٹری گروپ کے ڈائریکٹر رامی عبدالرحمٰن کے حوالے سے لکھا ہے کہ جمعے کی شام صوبہ ادلب کے شہر اریحا میں افطار کے بعد اُس وقت زوردار دھماکا ہوا، جب مسجد میں نمازِ مغرب ادا کی جارہی تھی۔

رامی عبدالرحمٰن کے مطابق واقعے میں مزید ہلاکتوں کا بھی خدشہ ہے کیوں کہ دھماکے کے نتیجے میں متعدد افراد زخمی بھی ہوئے ہیں۔

برطانوی آبزرویٹری گروپ کے مطابق "النصرت گروپ کے اہم رہنما سمیت 25 اراکین صوبہ ادلب کی مسجد میں دھماکے کے نتیجے میں ہلاک ہوئے"۔

تاہم ابھی تک دھماکے کی نوعیت کا تعین نہیں کیا جاسکا۔

شامی انقلاب کے جنرل کمیشن نامی ایک سرگرم گروپ کاکہنا ہے کہ "النصرت فرنٹ کے اراکین سمیت سینکڑوں مسلمان اریحا کی ایک مسجد میں افطار کے بعد نمازِ مغرب کے لیے جمع تھے کہ دھماکا ہوا"۔

گروپ کے مطابق اس دھماکے کے نتیجے میں عام شہری بھی ہلاک ہوئے ہیں تاہم اس حوالے سے مزید معلومات فراہم نہیں کی گئیں۔

واضح رہے کہ صوبہ ادلب کے زیادہ تر حصے پر باغیوں کا قبضہ ہے جنھوں نے حکومتی فورسز کویہاں سے بے دخل کرنے کے لیے اپوزیشن گروپ النصرت فرنٹ کے ساتھ الحاق قائم کررکھا ہے۔

شام میں 2011 کے بعد سے شروع ہونے والے حکومت مخالف احتجاج اور سول وار کے نتیجے میں اب تک 230,000 سے زائد افراد ہلاک ہوچکے ہیں۔