معروف چینی کمپنی ہیواوے نے اپنا نیا اسمارٹ فون میٹ 8 متعارف کرا دیا ہے۔

لاس ویگاس میں سی ای ایس نمائش کے دوران ہیواوے نے اپنا نیا فلیگ شپ اسمارٹ فون متعارف کرایا۔

6 انچ 1080p ڈسپلے اسکرین کے ساتھ یہ اسمارٹ فون میٹ 7 فیبلیٹ جیسے فیچرز سے بھرپور ہے۔

اس میں اوکٹا کور کرین 950 چپ سیٹ موجود ہے جو پہلے کے مقابلے میں بہترین کارکردگی اور افادیت کی حامل ہے جبکہ 16 این ایم فن فیٹ پروسیسر کے ساتھ یہ طاقتور ترین سی پی یو کا حامل فون ہے۔

اس میں ایل ٹی ای کیٹ سکس موڈیم بھی نصب ہے جبکہ اس کے دیگر فیچرز میں پہلے سے زیادہ طاقتور 16 میگا پکسلز کیمرہ جس میں ہیواوے کا اپنا امیج سگنل پروسیسر اور سونی کا سنسر موجود ہے جو اسے زبردست بنادیتے ہیں۔

اسی طرح 128 جی بی تک اسٹوریج، 4000 ایم اے ایچ بیٹری اور پہلے سے موثر آئی فائی سنسری پروسیسر کے ساتھ اس المونیم اسمارٹ فون میں اینڈرائیڈ 6.0 آپریٹنگ سسٹم موجود ہے۔

تاہم اس میں حیرت انگیز طور پر یو ایس بی ٹائپ سی پورٹ چارجنگ کے لیے موجود نہیں تاہم پہلے سے زیادہ تیز فنگر پرنٹ اسکینر ضرور اس کا حصہ ہے۔

یہ فون 4 رنگوں میں فروخت کے لیے پیش کیا جائے گا تاہم اس کی قیمت کا اعلان ابھی تک نہیں ہوا۔

توقع ہے کہ رواں ماہ یا فروری میں اسے فروخت کے لیے پیش کردیا جائے گا۔

آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔