بولی وڈ اداکارہ بپاشا باسو کی شادی کی خبریں کافی عرصے سے گردش کر رہی ہیں تاہم اداکارہ کا کہنا ہے کہ وہ اپنی شادی کا اعلان خود کریں گی۔

انڈین ایکسپریس کی ایک رپورٹ کے مطابق بپاشا باسو کا نام ان کے ساتھی اداکار کرن سنگھ گروور کے ساتھ جوڑا جارہا ہے اور دونوں اداکار متعدد تقریبات میں بھی ایک ساتھ نظر آتے ہیں۔

37 سالہ بپاشا باسو اور 34 سالہ کرن سنگھ کی دوستی کی خبریں 2015 میں ریلیز ہارر فلم ’الون‘ کے بعد میڈیا کی زینت بنیں، جس کے بعد ان کی شادی کی بھی قیاس آرائیاں ہونے لگیں۔

تاہم بپاشا باسو نے ان خبروں کی تردید کردی۔

اداکارہ نے ٹوئٹر پر اپنے پیغام میں کہا، ’اگر مجھے شادی کرنی ہوگی اور جب بھی کرنی ہوگی تو اس کا اعلان میں خود کردوں گی، گزارش ہے کہ اس بات کو غیر سنجیدگی سے نہ لیا جائے‘۔

رپورٹ کے مطابق بپاشا کا مزید کہنا تھا ’میں کئی سالوں سے اس بحث سے نمٹ رہی ہوں، میں گزارش کرتی ہوں کہ صبر کریں کیوں کہ یہ میری زندگی ہے‘۔

واضح رہے کہ بپاشا باسو کا ماضی میں ان کے ساتھی اداکار اور پروڈیوسر جان ابراہم کے ساتھ بھی نام جوڑا گیا تاہم ذاتی وجوہات کی بناء پر دونوں کا بریک اپ ہوگیا تھا۔

دوسری جانب کرن سنگھ کی اس سے قبل دو شادیاں ہوچکی ہیں تاہم دونوں ہی ناکام ثابت ہوئیں۔

*آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں.*