یونس خان پاکستان کپ چھوڑ کر کراچی روانہ

عبدالغفار شائع April 23, 2016

واٹس ایپ چینل

فیصل آباد: قومی کرکٹ ٹیم کے تجربہ کار بلے باز یونس خان، پاکستان کپ میں ناقص امپائرنگ کے خلاف احتجاج کرنے کے بعد میچ ریفری کی جانب سے جرمانہ عائد کرنے پر احتجاجی طورپر ٹورنامنٹ ادھورا چھوڑ کر کراچی کے لیے واپس روانہ ہوگئے۔

فیصل آباد کے اقبال اسٹیڈیم میں کھیلے جارہے پاکستان کپ میں یونس خان خیبرپختونخوا (کے پی کے) کی قیادت کررہے تھے۔

کے پی کے ٹیم منیجر مختیار حسین نے ڈان نیوز سے گفتگو میں تصدیق کی کہ یونس خان پاکستان کپ ادھورا چھوڑ کر واپس کراچی جا رہے ہیں۔

ان کا کہنا تھا کہ یونس کا موقف ہے کہ موجودہ حالات میں کرکٹ کھیلنا ان کے لیے ممکن نہیں رہا اس لیے وہ پاکستان کپ چھوڑ کر پہلے لاہور جائیں گے اور وہاں سے کراچی کے لیے روانہ ہوں گے۔

ذرائع کے مطابق یونس خان ٹورنامنٹ میں امپائر شوزب رضا سے خاص طور پر پریشان رہے جنہوں نے پہلے میچ میں مصباح الحق کو اس وقت آؤٹ قرار نہیں دیا تھا جب ہدف کے تعاقب میں اسلام آباد کی تین وکٹیں صرف 9 رنز پر گر گئی تھیں جس کے بعد مصباح نے اچھی بلے بازی کا مظاہرہ کرتے ہوئے 82 رنز کی اننگز کھیل کر اسلام آباد کو کامیابی دلائی تھی۔

ذرائع نے مزید بتایا کہ یونس خان اپنے دوسرے میچ میں بھی امپائرنگ سے مایوس نظر آئے جبکہ میچ کے فوتھ امپائر راشد ریاض سے شکایت کی جس پر انھیں نوٹس بھیجا گیا لیکن وہ نوٹس پر حاضر نہیں ہوئے۔

واضح رہے دوسرے میچ میں کے پی کے ٹیم نے پنجاب کو 2 رنز سے ہرایا تھا۔

مزید پڑھیں: پاکستان کپ: خیبرپختونخوا کی پنجاب سے فتح

میچ ریفری عزیز الرحمان نے یونس خان کو میچ فیس کا 50 فی صد جرمانہ عائد کیا جس پر یونس خان احتجاجی طورپر پاکستان کپ ادھورا چھوڑ کر کراچی کے لیے روانہ ہوگئے۔

یونس خان ناقص امپائرنگ کے خلاف پی سی بی کو رپورٹ نہ بھیجنے پر اپنی ٹیم انتظامیہ سے بھی ناراض ہیں۔

کے پی کے کو اسلام آباد کے خلاف پہلے میچ میں دو وکٹوں سے شکست کا سامنا کرنا پڑا تھا جبکہ دوسرے میچ پنجاب کے خلاف صرف دو رنز سے کامیابی حاصل ہوئی تھی۔

یونس خان کی عدم موجودگی میں ٹیم کی قیادت احمد شہزاد کریں گے۔

پی سی بی نے قومی کھلاڑیوں کو انگلینڈ کے دورے سے قبل ڈومیسٹک سطح پر ایک بڑے ٹورنامنٹ کا انتظام کیا ہے جس میں اسلام آبا، خیبرپختونخوا،بلوچستان، سندھ اور پنجاب پر مشتمل پانچ ٹیمیں شامل ہیں جبکہ ٹورنامنٹ میں شامل کھلاڑیوں کو معاوضے میں 100 فی صد اضافہ کیا گیا۔

آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔

واٹس ایپ چینل

تبصرے (4) بند ہیں

Dr.Afzaal Malik Apr 23, 2016 06:46pm

ڈومیسٹک کرکٹ ٹورنامنٹس میں امپائرنگ کا معیار اکثر ناقص دیکھا گیا ہے۔ کیا وجہ ہے کہ ایسے امپائروں کو کوئی نہیں پوچھتا۔ امپائرز کے غلط فیصلوں پر اُن کیخلاف کارروائی کرنے کیلئے بھی کوئی پینل تشکیل دیا جانا چاہئے جو ہر پہلو سے معاملے کو جانچ کر اس امپائر کو تاحیات بین بھی کر سکیں۔ انصاف کے اس طریقہ کار سے امپائرز بھی ’’میچ فکسنگ جیسی کرپشن‘‘ نہیں کر سکیں گے۔ اگر امپائرز کو بھی کوئی پوچھنے والی اتھارٹی ہوتی تو آج یونس خان جیسا واقعہ نہ ہوتا کہ جنہیں صرف اپیل کرنے کی پاداش میں جرمانوں کا سامنا کرنا پڑا اور وہ امپائرنگ کے انتہائی معیار پر مایوسی کا شکار نہ ہوتے۔ اب یہ کرکٹ بورڈ کا کام ہے کہ بار بار اور دانستہ امپائرنگ کے غلط فیصلوں کا نوٹس لیں اور ایسے تھرڈ کلاس امپائرز کو آئندہ کیلئے ناموزوں قرار دیا جائے اور اسکے بعد تاحیات بین کر دیا جائے تاکہ وہ اپنا اصلی کام رکشہ چلانے یا حجام کی دکان چلانے کا کر سکیں۔ قومی کرکٹ میں امپائرنگ کے ناقص معیار اور ملی بھگت کا نوٹس لیا جانا چاہئے۔

راشد نذیر Apr 23, 2016 09:36pm

یقینی طور پر امپائرنگ کا معیار انتہائی سطحی ہے۔ مگر اپنے یونس خان کے جذباتی رویے کو کیا کہیں، اتنا سینیر کھلاڑی مگر امیچیور ۔ 2007 میں آئی سی سی چیمپئنز ٹرافی میں یونس کپتان تھے اور ٹیم کی بھارت روانگی سے ایک روز قبل بھی ایسا ہی کچھ ہوا تھا یونس نے پریس کانفریس کر کے کپتانی چھوڑنے کا اعلان کیا، وجہ تھی کہ کرکٹ بورڈ کے چیرمین سے انکی ملاقات میں کوئی مسئلہ تھا ۔

Dr.Afzaal Malik Apr 24, 2016 03:03am

جب تمام فورمز سے انسان مایوس ہو جائے تو ایسا ہی رویہ سامنے آتا ہے۔ یونس خان ایک انتہائی میچور سینئر اور محب وطن کھلاڑی ہیں۔ انہوں نے ہر موقع پر ٹیم کیلئے اچھی کارکردگی دکھائی۔ ٹیسٹ ٹیم کا ایک لازمی حصہ ہونے کے علاوہ ون ڈے میں بھی اپنی اہمیت ثابت کر چکے ہیں۔ اگر امپائر بھی میچ فکسنگ جیسی غلط امپائرنگ کرینگے اور انہیں کوئی نہیں پوچھے گا تو پھر آئندہ کئی یونس خان پیدا ہونگے جو دلبرداشتہ ہو کر خاموشی سے گرائونڈ چھوڑ کر باہر چلے جائیں گے۔ کم از کم ایک امپائر سے اگر غلطی ہو جائے تو کوئی بات نہیں شاید وہ بھی انسان ہی ہو لیکن پاکستان بھر کے تمام امپائرز سمیت میچ ریفری اور دیکھنے سسنے والے بھی اگر مجرمانہ خاموشی یا جانبداری اختیار کر لیں تو یہ انتہائی تشویش ناک بات ہے۔ یونس خان ایک انتہائی اچھے کھلاڑی ہیں اور سپورٹس مین سپرٹ ان میں کوٹ کوٹ کر بھری ہوئی ہے ۔ وہ جس خوبصورت انداز میں دبائو کے دوران بھی چوکا چھکا مار کر مسکراتے نظر آتے ہیں صرف انہی کا خاصہ ہے۔ پاکستان کے تمام تجزیہ نگار اگر یونس خان کے رویئے کو نامناسب قرار دینگے تو کم از کم انہیں جانبدارانہ امپائرنگ پر بھی تنقید کرنی چاہئے۔

الیاس انصاری Apr 24, 2016 12:43pm

یونس خان اگر اپنے جذبات کو قابو میں نہیں رکھ سکتے تو انہیں ریٹائرمنٹ لے لینی چاھئے