کراچی: پاک فوج نے ایک کامیاب آپریشن کے بعد چیف جسٹس سندھ ہائی کورٹ سجاد علی شاہ کے مغوی بیٹے اویس شاہ کو صوبہ خیبر پختونخوا کے ضلع ٹانک سے بازیاب کروا لیا۔

بعدازاں اویس شاہ کو کراچی میں واقع ان کی رہائش گاہ پر پہنچا دیا گیا، اس موقع پر ڈائریکٹر جنرل (ڈی جی) رینجرز میجر جنرل بلال اکبر بھی ان کے ہمراہ تھے۔

ڈان نیوز کے مطابق چیف جسٹس سندھ ہائی کورٹ کے بیٹے اویس شاہ کو خصوصی طیارے کے ذریعے فیصل بیس، کراچی لایا گیا، جنھیں سخت سیکیورٹی میں ان کے گھر منتقل کیا گیا۔

اس موقع پر اویس شاہ کے گھر کے باہر مٹھائیاں بھی تقسیم کی گئیں۔

اس سے قبل پاک فوج کے شعبہ تعلقات عامہ یعنی انٹر سروسز پبلک ریلشنز (آئی ایس پی آر) کے ڈائریکٹر جنرل (ڈی جی) لیفٹیننٹ جنرل عاصم باجوہ نے ٹوئٹر پر اویس شاہ کی بازیابی کی خبر دیتے ہوئے کہا تھا کہ آپریشن کے دوران 3 دہشت گردوں کو بھی ہلاک کیا گیا۔

عاصم باجوہ نے مزید کہا کہ ’سندھ چیف جسٹس کے بیٹے کو انٹیلی جنس بیسڈ آپریشن (آئی بی او) کے دروان خیبر پختونخوا کے ضلع ٹانک میں اغوا کاروں کے قبضے سے چھڑایا گیا۔’

انہوں نے اویس علی شاہ کی خیریت کے حوالے سے بھی ٹوئیٹ کی اور لکھا کہ ’اویس شاہ سیکیورٹی فورسز کے ساتھ خیریت سے ہیں، اویس شاہ کو آج کسی وقت کراچی میں ان کے گھر منتقل کر دیا جائے گا۔‘

جنرل عاصم سلیم باجوہ کے مطابق آرمی چیف جنرل راحیل شریف نے سیکیورٹی فورسز کی کارکردگی کو سراہتے ہوئے اویس شاہ کی بازیابی پر سندھ ہائی کورٹ کے چیف جسٹس کو مبارکباد دی۔

وزیراعظم کی مبارکباد

ڈان نیوز کے مطابق وزیراعظم نوازشریف نے اویس شاہ کی بازیابی پر چیف جسٹس سندھ ہائیکورٹ کو مبارکباد دیتے ہوئے کہا کہ خفیہ اداروں اورسیکیورٹی فورسز کی بہترین پیشہ ورانہ مہارت کی بدولت یہ بازیابی ممکن ہوئی۔

وزیراعظم کا کہنا تھا کہ اویس شاہ کی بازیابی میں سیکیورٹی فورسز کا کردار قابل تحسین ہے۔

وزیراعلیٰ سندھ کی چیف جسٹس کے گھر آمد

بعدازاں وزیراعلیٰ سندھ سید قائم علی شاہ، چیف جسٹس سندھ ہائی کورٹ سجاد علی شاہ کے گھر گئے اور انھیں ان کے بیٹے اویس شاہ کی بازیابی پر مبارکباد دی۔

وزیراعلیٰ سندھ کا کہنا تھا کہ سیکیورٹی فورسز نے نہایت تندہی سے اویس شاہ کو بازیاب کروایا۔

ان کا کہنا تھا کہ اویس شاہ کے اغواء کی تحقیقات جاری رہیں گی، جنھیں سامنے لایا جائے گا اور جس کسی کی غفلت کی وجہ سے یہ واقعہ پیش آیا، ان کے خلاف کارروائی کی جائے گی۔

یہ بھی پڑھیں: چیف جسٹس سندھ ہائی کورٹ کے بیٹے لاپتہ

خیال رہے کہ 20 جون کو چیف جسٹس سندھ ہائی کورٹ جسٹس سجاد علی شاہ کے بیٹے اویس شاہ کو کراچی کے علاقے کلفٹن میں واقع ایک سپر اسٹور کے باہر سے اغواء کرلیا گیا تھا۔

اویس علی شاہ کے اغواء کے چشم دید گواہوں کا کہنا تھا کہ کلفٹن میں واقع سپر اسٹور کے گارڈز سمیت کوئی بھی انہیں بچانے کے لیے آگے نہیں آیا تھا۔

خبررساں ادارے رائٹرز کے مطابق عینی شاہدین نے پولیس کو بتایا تھا کہ اویس نے ملزمان سے مزاحمت کی، تاہم ملزمان نے جلد ہی ان پر قابو پالیا اور انھیں سفید رنگ کی گاڑی میں ڈال کر لے گئے۔

پولیس کا کہنا تھا کہ اویس شاہ کی گاڑی پنجاب چورنگی سے برآمد کی گئی، جبکہ اویس شاہ کے اہل خانہ نے قانون نافذ کرنے والے اداروں کو ان کے لاپتہ ہونے سے متعلق شام کو بتایا۔

سیکیورٹی عہدیداروں نے نام ظاہر نہ کرنے کی شرط پر بتایا تھا کہ اغواء کار اویس علی شاہ کی رہائی کے بدلے کچھ عسکریت پسندوں کو چھڑوانے کا مطالبہ کرسکتے ہیں۔

مزید پڑھیں: اویس علی شاہ عسکریت پسندوں کیلئے 'بارگیننگ چپ'

پولیس نے شبہ ظاہر کیا تھا کہ اویسں شاہ کو عسکریت پسندوں کی رہائی کے لیے 'بارگیننگ چپ' کے طور پر استعمال کیا جاسکتا ہے۔

وزیراعلیٰ سندھ سید قائم علی شاہ نے اویس علی شاہ کے اغواء کے واقعے پر شدید غم وغصے کا اظہار کرتے ہوئے ہر 3 گھنٹے بعد رپورٹ طلب کی تھی۔

یہاں پڑھیں: علی حیدرگیلانی افغانستان سے بازیاب

خیال رہے کہ شدت پسندوں نے 5 سال قبل سابق گورنر پنجاب سلمان تاثیر کے بیٹے شہباز تاثیر کو جبکہ 3 سال قبل سابق وزیراعظم یوسف رضا گیلانی کے بیٹے کو بھی پنجاب سے اغوا کیا تھا، جنھیں رواں برس ہی بازیاب کروایا گیا۔