چِٹوڑی: حکمران خاندان کا شہرِ خموشاں
سندھ میں جیسے ہی کلہوڑا خاندان کی حکمرانی کا سورج غروب ہوا تو تالپور گھرانے کی حکمرانی کا سورج طلوع ہوگیا۔ سندھ میں کلہوڑا خاندان کا عہد حکومت 1700 سے شروع ہوا جو کہ 1782 تک جاری رہا۔ اس کے بعد حکومت کی باگ ڈور تالپور خاندان کے ہاتھ میں آ گئی۔
میر علی مراد خان تالپور نے 1806 میں میرپورخاص کا شہر تعمیر کروایا، اسی لیے انہیں “بانی میرپورخاص” کہا جاتا ہے۔ میروں کی حکمرانی کے زمانے میں یہ علاقہ “سرکار میرپور” کہلاتا تھا۔ میر شیر محمد خان تالپور سندھ کے آخری تالپور حکمران تھے۔
1843 میں انگریزوں نے تالپوروں سے ہی اقتدار چھینا تھا۔ مگر اب سندھ کے ان حکمرانوں کے قصے ہمیں یا تو تاریخ کی کتابوں میں پڑھنے کو ملتے ہیں یا پھر ان کے مزار دیکھ کر انہیں یاد کیا جاتا ہے۔
میر ٹھارو خان تالپور
میر ٹھارو خان میرپورخاص کے حکمران خاندان کے سربراہ تھے۔ تالپوروں نے 1783 میں ہالانی والی جنگ میں کلہوڑا خاندان کو شکست دی اور سندھ کے حکمران بن گئے۔ اس وقت میر ٹھارو خان نے میرپور سے حکومت کے باگ ڈور چلانے کا فیصلا کیا۔ انہوں نے ریگستان کی زمینیں بھی اپنے قبضے میں کر لیں۔ میر ٹھارو خان 1829 میں وفات پا گئے۔ جس کے بعد اس ریاست کے نئے سربراہ میر علی مراد خان ہوئے۔