ہندوستان کے زیرانتظام کشمیر کے مفتیٔ اعظم بشیر الدین احمد آج کل موسیقی سے تعلق رکھنے والے اور اس کو پسند کرنے والے طبقے کی تنقید کی زد میں ہیں۔ اس طبقے کا مطالبہ ہے کہ مفتی بشیر اپنے اس بیان پر معافی مانگیں، جس میں انہوں نے نوجوان لڑکیوں کے راک بینڈ پراگاش کو ختم کرنے کے لیے زور دیا تھا۔

تین نوجوان ٹین ایجر لڑکیوں پر مشتمل اس گروپ نے مفتی بشیر الدین احمد کے فتوے کے ایک دن کے بعد یہ فیصلہ کیا کہ وہ اپنا راک بینڈ ختم کررہی ہیں۔ مفتی بشیر نے اس فتوے میں کہا تھا کہ اسلام میں موسیقی اور گانا بجانا جائز نہیں ہے، لہٰذا انہوں نے کہا تھا کہ ان لڑکیوں کو یہ کام نہیں کرنا چاہئیے۔

ان لڑکیوں نے معاشرتی رسم ورواج کے برعکس ہمت کا مظاہرہ کیا تھا، لیکن جب انہیں آن لائن دھمکیاں دی جانے لگیں اور قدامت پرست معاشرے کی طرف گالیاں تک دی جانے لگیں اور ان لڑکیوں کی زندگی کو ہی خطرات لاحق ہوگئے تو انہوں نے اپنے بینڈ کو ختم کرنے کا اعلان کردیا۔

مفتی بشیرالدین نے کہا تھا ”میں یہ بات کہہ چکا ہوں کہ موسیقی اور گانا بجانا اسلامی تعلیمات سے مطابقت نہیں رکھتا ہے۔“

لیکن اب خود مفتی بشیر ایک عوامی محفل موسیقی میں موسیقی سے لطف اندوز ہوتے ہوئے پکڑے گئے ہیں، اور ان کی اس محفل میں شرکت اور موسیقی سے لطف اندوز ہونے کا ثبوت ایک وڈیو کی صورت میں دنیا بھر میں بذریعہ انٹرنیٹ اور موبائل فون پھیل گیا ہے۔

گلوکاروں اور موسیقاروں کا ایک اعلیٰ سطح کا پلیٹ فارم کشمیر میوزک کلب کے چیئرمین وحید جیلانی کا کہنا ہے کہ ”مفتی صاحب کو سب نے موسیقی سے لطف اندوز ہوتے دیکھ لیا ہے۔ خلافِ اسلام قرار دے کر جس کام سے وہ اُن لڑکیوں کو روک رہے تھے، خود اس کا لطف اُٹھا رہے ہیں،یہ سراسر منافقت ہے۔ اس وقت اس بات کی ضرورت ہے کہ وہ ان لڑکیوں سے معافی مانگیں۔“

یادرہے کہ مفتی بشیر کے فتوے کے بعد سے ہی ان لڑکیوں کو جان سے مار دینے کی دھمکیاں ملنی شروع ہوئی تھیں۔