کمشنر کراچی افتخار شلوانی نے کورونا وائرس کا پھیلاؤ روکنے کے لیے سپریم کورٹ کے احکامات کی روشنی میں شاپنگ مالز کے لیے معیاری طریقہ کار (ایس او پیز) جاری کردیا۔

کمشنر نے انتظامی حکم نامے کے مطابق ہر خریدار کی تھرمل گن سے اسکیننگ کی جائے گی جبکہ کسی صارف کو ماسک کے بغیر شاپنگ مال میں داخلے کی اجازت نہیں ہوگی۔

شاپنگ مالز کے داخلی راستوں پر ہینڈ سینیٹائزرز کی موجودگی کو یقینی بنایا جائے گا جبکہ بخار، نزلہ یا کھانسی میں مبتلا کسی بھی خریدار کو مالز یا سینٹر میں داخل ہونے کی اجازت نہیں ہوگی۔

حکم نامے میں کہا گیا ہے کہ خریداروں کی عمومی تعداد کو کم از کم ایک تہائی کم کیا جائے گا، محفوظ سماجی فاصلے کے لیے ڈیجیٹل طریقے سے مدد لی جائے گی تاکہ آنے اور جانے والوں کو مسلسل مانیٹر کیا جا سکے، جبکہ خریداروں کی مالز میں موجود تعداد کو دیکھ کر ان کے اندر داخل ہونے کا تعین کیا جا سکے گا۔

حکم نامے میں مزید کہا گیا ہے کہ 12 سال سے کم اور 55 سال سے زائد عمر کے خریداروں کو شاپنگ مالز میں داخلے کی اجازت نہیں ہوگی جبکہ ایس او پیز سے خریداروں کو آگاہ کر نے کے لیے تحریری ہدایات نمایاں طو ر پر آویزان کی جائیں گی۔