میرا بچپن جس قصبے میں گزرا تھا وہاں بارش اور بجلی کا وہی تعلق تھا جو آج کل حکومت اور عقل کا ہے۔ یعنی ایک آتی تھی تو دوسری چلی جاتی تھی اور تب تک غائب رہتی تھی جب تک پہلی واپس نہ چلی جائے۔

ان دنوں بجلی اور حکومتیں تھوڑی تھوڑی دیر کے لیے رہا کرتی تھیں اور جہاں تک عقل کا تعلق ہے تو اسے ہمارے بھیجے میں گھسانے کی ذمہ داری ٹی وی کے بجائے ہماری دادی کے پاس تھی۔ ہوتا کچھ یوں تھا کہ شام ڈھلے لائٹ جاتی تو ہماری دادی مرحومہ اپنے پون درجن پوتے پوتیوں کے بیچ بیٹھ جاتیں اور پرائم ٹائم شروع ہو جاتا۔

اس پرائم ٹائم میں انٹرٹینمنٹ بھی ہوتی تھی اور حالات حاضرہ بھی۔ ہم میں سے وہ جو ہم کزنز میں کچھ بڑے تھے دادی کو یہ بتایا کرتے تھے کہ آج اخبار میں کیا پڑھا تو چھوٹے دادی کا کہانیوں والا چینل لگانے کے چکر میں رہا کرتے تھے۔

دادی پہ ٹی وی کے ریموٹ کی طرح قبضے کی جنگ عام طور پر نیلام گھر پر ختم ہوتی تھی جس میں پہیلیوں اور سوالوں کا صحیح جواب دینے کے انعام میں چینی کی چٹکی سے برفی کے ٹکڑے تک سبھی کو کچھ نا کچھ مل جاتا تھا۔

اسی نیلام گھر کے سیشن میں ہماری دادی نے ہمیں 'مگس کو باغ میں جانے نہ دیجو ... کہ ناحق خوں پروانے کا ہوگا' والا بدنام زمانہ شعر سنا کر یہ پوچھا تھا کہ بھلا بتاؤ تو سہی شہد کی مکھی کے باغ میں جانے کا پروانے کے خون ہونے سے کیا تعلق ہے؟

اس زمانے کی دادیاں آجکل کی حکومتوں کی طرح اپنی پٹاری میں ایک آدھ ایسی پہیلی رکھا کرتی تھیں جس کی مدد سے وہ برفی کا ٹکڑا دینے سی پہلے بچوں کا صبر آزما سکیں۔

چند دن پہلے حکومت سندھ کے وزیر داخلہ نے کراچی کے امن کی برفی تقسیم ہونے کے انتظار میں بیٹھے صحافیوں کے سامنے جب یہ اعلان کیا کہ ٹارگٹ کلنگ اور بھتہ خوری پر قابو پانے کے لیے حکومت ٹینگو، وائبر، سکائپ اور ایسی ہی سمارٹ فوں ایپلیکیشنز پر پابندی لگا رہی ہے تو مجھے لگا کہ انہوں نے یہ پہیلی میری دادی کے پاندان کی کسی کلیا سے نکالی ہے۔

شعر کی گتھی تو ہماری دادی نے اسی دن سلجھا دی تھی کہ نا مگس باغ میں جائے گا نا پھولوں کا رس چوسے گا نہ اسے موم کا چھتہ بنانا پڑے گا نہ اس موم سے موم بتی بنے گی نا وہ موم بتی روشن ہوگی اور نہ پروانہ اس پر جل کر مرے گا۔ رہی اس پالیسی کی گتھی تو وہ مجھ سے ہفتے بھر میں بھی نہیں سلجھ سکی، ہاں اتنا اندازہ ضرور ہو گیا ہے کہ دہشت گردی کے جرم میں سکائپ، ٹینگو، وائبر وغیرہ کے خلاف ایف آئی آر کاٹنا پروانے کی ٹارگٹ کلنگ کے الزام میں مگس کی گرفتاری سے کچھ بہت مختلف نہیں ہے۔

میری دادی نے جب اس شعرکا مطلب پوچھا تھا تو میں نے کسی نا کسی طرح صبر کر لیا تھا لیکن اگر میں شرجیل میمن صاحب کی پریس کانفرنس میں ہوتا تو ان سے یہ ضرور پوچھتا کہ کیا یہ سمارٹ فون ایپلیکیشنز ہی دہشت گردی کا سبب ہیں یا بم، بارود، اور بندوق جیسے بے ضرر آلات موسیقی پر پابندی لگا کر بھی کراچی میں موت کا رقص روکا جا سکتا ہے۔