مکہ مکرمہ: دنیا بھر سے پچیس لاکھ عازمین حج سعودی عرب کے شہر مکۃ المکرمہ پہنچ گئے ہیں جہاں کل سے مناسک حج کا آغاز ہو گا۔
دنیا بھر سے پچیس لاکھ مسلمان حج کے لیے مکہ مکرمہ پہنچ گئے ہیں اور حج کا رکن اعظم وقوفِ عرفات جمعرات کو ادا کیا جائے گا۔
لاکھوں مسلمان مناسک حج کی ادائیگی کیلیے کل شام مکہ مکرمہ سے منیٰ پہنچیں گے اور وہاں رات بسر کریں گے۔
رات منیٰ میں قیام کے بعد عازمین حج میدان عرفات روانہ ہوں گے جہاں مسجد نمرہ میں خطبہ حج کے بعد ظہر اور عصر کی قصر نمازیں ایک ساتھ ادا کی جائیں گی۔
حج کا رکن اعظم وقوف ادا کرکے سورج غروب ہونے کے بعد حجاج کرام مزدلفہ روانہ ہوجائیں گے جہاں وہ مغرب اور عشا کی نمازیں ایک ساتھ ادا کریں گے۔
مزدلفہ میں رات قیام کے دوران حجاج رمی جمرات کے لیے کنکریاں چُنیں گے اورطلوع آفتاب کے بعد منیٰ روانہ ہوجائیں گے۔
حج کے تیسرے روز حجاج کرام مزدلفہ میں نماز فجر کی ادائیگی اور طلوع آفتاب کے بعد منیٰ روانہ ہوں گے جہاں سب سے بڑے شیطان کو کنکریاں ماری جائیں گی۔
رمی کے بعد حجاج جانور کی قربانی اورسر مُنڈوا کر یا بال کٹوا کر اپنا احرام کھول دینگے۔
اس کے بعد مکہ المکرمہ جاکر مسجد الحرام میں طواف زیارت اور صفا و مروہ کے درمیان سعی کریں گے اور بعدازاں حجاج کرام واپس منیٰ چلے جائیں گے۔
سعودی حکومت نے اس عظیم اجتماعی عبادت کے لیے فول پروف انتظامات کیے ہیں، رمی کے دوران بھگدڑ یا کسی اور حادثے سے بچنے کے لیے خصوصی انتظامات بھی کیے گئے ہیں جبکہ عازمین کو سفری سہولیات فراہم کرنے کی غرض سے خصوصی ٹرین بھی چلائی گئی ہے۔
