انڈونیشیا کا صوبہ آچے صبح ساڑھے 5 بجے کے قریب 6.5 شدت کے خوفناک زلزلے سے لرز اٹھا، جس کے نتیجے میں 97 افراد ہلاک اور سیکڑوں زخمی ہوگئے۔

امریکی جیولوجیکل سروے کے مطابق زلزلے کی زیر زمین گہرائی 17 کلومیٹر تھی اور اس کا مرکز صوبہ آچے کے شمال میں واقع قصبہ ریولیوٹ تھا۔

زلزلے کے باعث لوگ گھبرا کر عمارتوں سے باہر نکل آئے۔

زلزلے کے نتیجے میں کئی عمارتیں گرگئیں جس کے بعد پولیس اور ریسکیو ٹیمیں متاثرہ علاقوں میں پہنچیں اور عمارتوں کے ملبے تلے موجود لوگوں کو نکالنے کا کام شروع کردیا گیا۔

انڈونیشیا کے محکمہ موسمیات اور جیوفزکس ایجنسی کا کہنا تھا کہ زلزلے کے نتیجے میں سونامی کا خطرہ نہیں ہے جبکہ حکام نے ہلاکتوں میں اضافے کا خدشہ بھی ظاہر کیا۔