آسٹریلیا نے پاکستان سیریز کے چوتھے ایک روزہ میچ میں 6 رنز سے شکست دے کر سیریز میں 4-0 کی فیصلہ کن برتری حاصل کرلی۔

دبئی کرکٹ اسٹیڈیم میں آسٹریلیا نے پہلے بیٹنگ کرتے ہوئے پاکستانی ٹیم کو 278 رنز کا ہدف دیا جس میں گلین میکسویل کے 98 اور عثمان خواجہ کے 62 رنز کے علاوہ الیکس کیری کے 55 رنز بھی شامل تھے۔

ہدف کے تعاقب میں پاکستان کی جانب سے اپنا پہلا میچ کھیلنے والے عابد علی اور محمدرضوان نے دوسری وکٹ کی ریکارڈ شراکت میں 144 رنز بنا کر ٹیم کو جیت کی امید دلائی لیکن عابد علی کے آؤٹ ہونے کے بعد دیگر بلے باز جیت دلانے میں ناکام ہوئے۔

پاکستان نے مقررہ اوورز میں 8 وکٹوں پر 271 رنز بنائے اور میچ میں 6 رنز سے شکست کا سامنا کیا۔