کراچی: رینجرز کا ٹارگٹڈ آپریشن، 130 گرفتاریاں
ترجمان رینجرز کے مطابق ملزمان کے قبضے سے اسلحہ اور منشیات بھی برآمد ہوئی ہیں, مزید تفتیش جاری ہے۔
کراچی: پاکستان کے تجارتی حب کراچی میں رینجرز نے مختلف علاقوں میں ٹارگٹڈ آپریشن کرتے ہوئے 310 مشتبہ افراد کو گرفتار کرلیا۔
ڈان نیوز ٹی وی کے مطابق رینجرز نے شہر کے علاقے لانڈھی، بھینس کالونی، قائدآباد، شاہ لطیف ٹاؤن، کورنگی، کلفٹن، بلدیہ ٹاؤن اور سعید آباد سمیت مختلف علاقوں میں ہفتے کے روز کارروائی کی، جس کے نتیجے میں ایک سو تیس مشتبہ افراد کو حراست میں لیا گیا۔
ایک اور کارروائی میں پولیس نے مشرقی زون میں چھاپے مارے جس کے نتیجے میں 180 مشتبہ افراد کو گرفتار کر لیا گیا۔
رینجرز ترجمان کے مطابق ملزمان کے قبضے سے اسلحہ اور منشیات بھی برآمد کی گئی ہیں۔ ملزمان سے مزید تفیش کا سلسلہ جاری ہے۔
یاد رہے کہ کراچی شہر میں جرائم پیشہ افراد کے خلاف جاری آپریشن گزشتہ سال ستمبر میں وفاقی حکومت کی جانب سے منظوری کے بعد شروع ہوا تھا۔