یوگنڈا: صدر کو سوتا دکھانے پر ٹی وی چینل زیر عتاب
کمپالا: یوگینڈا کی حکومت نے پارلیمنٹ کے اندر صدر یووری موسیونی کو سوتا دکھانے پر ملک کے بڑے چینلوں میں شمار ایک ٹی وی سٹیشن پر آئندہ صدراتی تقریبات کی کوریج پر پابندی لگا دی۔
حکومتی میڈیا سینٹر کے مینیجر ڈینس کٹونگی نے اے ایف پی کو بتایا کہ سب کو پتا کہ صدر عادتاً مراقبے میں چلے جاتے ہیں لیکن اس کے باوجود کہا گیا کہ وہ سو رہے ہیں۔
سرکاری ترجمان نے وسطی افریقہ کے سب سے بڑے میڈیا ہاؤس کے ٹی وی چینل 'این ٹی وی یوگنڈا' کو سزا دینے کی تصدیق کی۔
'ہم ٹی وی چینل کے ساتھ اپنے تعلقات کا از سر نو جائزہ لے رہے ہیں اور ہم نے انہیں صدر کی مزید کوریج سے روک دیا ہے'۔
سرکاری ترجمان نے این ٹی وی پر جاندلرانہ کوریج اور پیشہ ورانہ مہارت کی کمی کا بھی الزام لگایا۔
کٹونگی کے مطابق یہ پابندی مستقل نہیں عارضی ہے تاکہ وہ اپنے طرز عمل پر غور کر سکیں۔
خیال رہے کہ1986 سے پسماندہ یوگنڈا کے 69 سالہ صدر افریقہ میں سب سے زیادہ عرصہ تک سربراہ رہنے کا ریکارڈ رکھتے ہیں۔
این ٹی وی کا کہنا ہے کہ انہیں اب تک معطلی سے باضابطہ طور پر آگاہ نہیں کیا گیا۔
گزشتہ سال بھی حکومت نے ملک کے دو بڑے اخبارات کو دس دنوں کے لیے بند کر دیا تھا۔ ان اخبارات نے فوجی جرنیلوں کے درمیان اس بحث کی خبر شائع کی تھی کہ آیا صدر کے بیٹے ان کے جانشین بن سکتے ہیں یا نہیں۔