شمالی وزیرستان: تازہ بمباری میں پانچ مبینہ عسکریت پسند ہلاک
پشاور: صوبہ خیبر پختونخوا کے قبائلی علاقے شمالی وزیرستان میں جاری ملٹری آپریشن کے دوران پاک فضائیہ کے جیٹ طیاروں کی تازہ ترین بمباری کے نتیجے میں مبینہ عسکریت پسندوں کے متعدد ٹھکانے تباہ اور پانچ شدت پسند ہلاک ہوگئے ہیں۔
ڈان ڈاٹ کام کے نمائندے کے مطابق ہفتے کو دتہ خیل کے مضافاتی علاقوں محمد خیل، پوئی خیل اور بیگان کےعلاقوں میں موجود عسکریت پسندوں کے مبینہ ٹھکانوں کو نشانہ بنایا گیا، جس کے نتیجے میں متعدد ٹھکانے تباہ اور پانچ عسکریت پسند ہلاک ہوگئے۔
پاکستانی افواج کے میڈیا ونگ آئی ایس پی نے بھی تازہ بمباری میں پانچ عسکریت پسندوں کے ہلاک ہونے کی تصدیق کی ہے۔
واقعے میں ایک سیکیورٹی اہلکار بھی اُس وقت ہلاک ہوا ، جب ہفتے کی صبح سیکیورٹی فورسز کے آپریشن کے دوران ایک نصب شدہ بم پھٹ گیا۔
ہلاک ہونےو الے زیا دہ تر شدت پسند ازبک باشندے تھے۔
میران شاہ کے علاقے میں اب تک چار سو سے زائد عسکریت پسندوں کو ہلاک کیا جا چکا ہے، جن میں زیادہ تر غیر ملکی ہیں، جبکہ بارود بنانے والی 19 فیکٹریوں کو بھی تباہ کردیا گیا ہے۔
دوسری جانب عسکری ذرائع کے مطابق شمالی وزیرستان کے علاقے اسپن وام کے علاقے میں سیکورٹی چوکی پر حملہ کیا گیا جس میں کم از کم ایک اہلکار ہلاک اور دو زخمی ہو گئے۔
| |
ذرائع کے مطابق میران شاہ کے ہر دوسرے گھر میں بارودی اور دھماکہ خیز مواد موجود ہے، جبکہ اکثر سڑکوں پر بھی بارودی مواد نصب کیا گیا ہے۔
اعلٰی سطح کے ایک سرکاری ذرائع نے نام ظاہر نہ کرنے کی شرط پر بتایا ہے کہ غیر ملکی عسکریت پسندوں نے مقامی افراد کو یرغمال بنا رکھاتھا۔
ذرائع کے مطابق سرچ آپریشن کے دوران سیکیورٹی فورسز کو متعدد بین الااقوامی دہشت گرد تنظیموں کے جھنڈے اورتحریری مواد حاصل ہوا ہے۔