پشاور: پاکستان کے قبائلی علاقے شمالی وزیرستان میں افغانستان کی جانب سے شدت پسندوں نے ایک پاکستانی چوکی پر حملہ کیا، تاہم سیکیورٹی فورسز نے اسے ناکام بنا دیا۔

سیکیورٹی ذرائع کے مطابق جوابی کارروائی میں گیارہ شدت پسند اور تین ایف سی اہلکار بھی ہلاک ہوئے ہیں۔

ڈان نیوز کے مطابق شدت پسندوں نے شمالی وزیرستان میں ڈانڈی کچ میں واقع سیکیورٹی فورسز کی چیک پوسٹ پر حملہ کیا۔

یاد رہے کہ شمالی وزیرستان ایجنسی میں پاک فوج دہشت گروں کے خلاف ایک مؤثر آپریشن کررہی ہے۔

پاک فوج کے شعبہِ تعلقاتِ عامہ یعنی آئی ایس پی آر کی جانب سب حال ہی میں آپریشن ضربِ عضب کی تفیصلات میڈیا کو فراہم کی گئی تھیں جن کے مطابق رواں 15 جون سے جاری فوجی کارروائیوں میں اب تک نو سو دس مشتبہ شدت پسند ہلاک ہوئے ہیں جن میں غیر ملکی شدت پسند بھی شامل ہیں۔

فوجی حکام کا کہنا ہے کہ ضربِ عضب میں پاک فوج کی کارروائی اب بھی جاری ہیں اور اب تک شدت پسندوں کے ساتھ لڑائیوں میں 82 جوان ہلاک ہوئے ہیں۔

واضح رہے کہ آپریشن ضربِ عضب رواں سال آٹھ جون کو کراچی کے بین الاقوامی ہوائی اڈے پر ہونے والے شدت پسندوں کے حملے کے صرف ایک ہفتے کے بعد شروع کیا گیا تھا جس کا مقصد شمالی وزیرستان کو مقامی اور غیر ملکی شدت پسندوں سے خالی کروانا ہے۔