انڈیا: ایک شخص کے دل میں دو ماہ سے پھنسی گولی نکال لی گئی
احمد آباد: ہندوستان میں ایک شخص جس کے دل میں دو مہینے سے گولی پھنسی ہوئی تھی، اب سرجری کے بعد تیزی سے صحت یاب ہو رہا ہے۔
ٹائمز آف انڈیا کی ایک رپورٹ میں بتایا گیا کہ 32 سالہ بھارت شرما کوجولائی میں مشرقی ریاست اتر پردیش میں ایک بینک ڈکیتی کے دوران فائرنگ میں دو گولیاں لگی تھیں۔
شرما کی کمر میں موجود گولی کو سرجری کے ذریعے نکال لیا گیا لیکن مقامی سرجنوں نے دل میں موجود گولی کو یہ کہہ کرنکالنے سے انکار کر دیا کہ اس کوشش میں شرما کی فوراً موت واقع ہو جائے گی۔
رپورٹ میں بتایا گیا کہ دل میں موجود.20 کیلبر کی گولی نکالنے کے لئے شرما کو با آخر منگل کے روز احمد آباد لے جایا گیا۔
دل کے سرجن انیل جین نے بدھ کو بتایا کہ انہوں نے اپنی دو رکنی ٹیم کے ساتھ تین گھنٹوں پر مشتمل ایک پیچیدہ آپریشن میں گولی نکالنے کے بعد دل پر ٹانکے لگائے۔
احمد آباد کے ایس اے ایل نامی نجی ہسپتال سے گفتگو میں جین نے مزید بتایا کہ گولی افقی طور پر دل کے دو والوز کے درمیان پھنیم ہوئی تھی۔
'چونکہ کہ واقعہ کے بعد مریض کا بہت زیادہ خون بہہ چکا تھا ۔لہذا ہم نے غیر معمولی احتیاط سے کام لیا۔ یہ مریض کی قسمت تھی کہ وہ اس واقعہ میں بچ گیا اور ہم تک پہنچا'۔
ڈاکٹر جین کا کہنا ہے کہ انتہائی نگہداشت کے یونٹ میں ریکوری کے بعد شرما ایک مہینہ مزید آرام کریں گے جس کے بعد وہ واپس اپنے کام پر جا سکیں گے۔