کابل: افغانستان کے دارالحکومت کابل میں سڑک کنارے نصب بم کے دھماکے میں کم سے کم چار سیکیورٹی اہلکار ہلاک اور تقریبا ایک درجن کے قریب زخمی ہوئے ہیں۔

افغان وزارتِ دفاع نے ایک بیان میں واقعے کی تصدیق کرتے ہوئے بتایا کہ شہر کے مغرب میں ہونے والے اس دھماکے میں افغان فورسز کی ایک بس کو نشانہ بنایا گیا جس میں میں چار فوجی اہلکار ہلاک اور 12 زخمی ہوئے۔

حکام کا کہنا ہے کہ زخمی ہونے والے افراد میں چھ عام شہری بھی شامل ہیں۔

حکام کے مطابق افغان طالبان نے مائیکرو بلاگنگ ویب سائٹ ٹوئٹر پر ایک پیغام میں اس واقعے کی ذمہ داری قبول کی ہے۔

افغان سیکیورٹی فورسز پر حملوں کے واقعات ایسے وقت میں اچانک بڑھ گئے ہیں جب اس سال کے آخر میں ملک سے غیر ملکی افواج انخلاء کی تیاریاں کررہی ہیں۔

افغانستان کی نئی حکومت اور امریکا کے درمیان ہونے والے حالیہ سیکیورٹی معاہدے کے تحت تقریباً نو ہزار آٹھ سو امریکی فوجی افغانستان میں ہی قیام کریں گے۔