خیبر ایجنسی میں فضائی کارروائی، 5 'دہشت گرد' ہلاک
خیبر ایجنسی: وفاق کے زیر انتظام قبائلی علاقے خیبرایجنسی میں سیکیورٹی فورسز کی کارروائی کے دوران پانچ مبینہ دہشت گرد ہلاک اور دس زخمی ہوگئے۔
نمائندہ ڈان ڈاٹ کام نے ذرائع کے حوالے سے بتایا ہے کہ سیکیورٹی فورسز نے آج بروز جمعہ خیبرایجنسی میں فضائی کارروائیاں کرتے ہوئے وادیٔ تیراہ کےعلاقوں آکاخیل اورسپاہ میں دہشت گردوں کے ٹھکانوں پر گولہ باری کی۔
جس کے نتیجے میں پانچ مبینہ دہشت گرد ہلاک اور دس زخمی ہوگئے۔
خیبر ایجنسی کے علاقے سپاہ کو لشکرِ اسلام کا مضبوط گڑھ تصور کیا جاتا ہے، جبکہ آکا خیل اور ملک دین کے علاقوں میں بھی دہشت گردوں کے ٹھکانے موجود ہیں۔
واضح رہے کہ خیبر ایجنسی کی تحصیل باڑہ میں جاری سیکورٹی فورسز کے آپریشن میں تیزی آگئی ہے اور وادیٔ تیراہ میں مبینہ دہشت گردوں کے ٹھکانوں کی جانب سیکورٹی فورسز کی پیش قدمی بھی تیز ہوگئی ہے۔
ان کارروائیوں کو ’آپریشن خیبر ون‘ کا نام دیا گیا ہے، جس کی تجویز وزیراعظم نواز شریف کی زیر صدارت ہونے والے اجلاس کے دوران دی گئی تھی۔
یاد رہے کہ سکیورٹی فورسز کی جانب سے شمالی وزیرستان میں 15 جون کو آپریشن ضربِ عضب کا آغاز کیا گیا تھا اور علاقے میں آزاد میڈیا کی رسائی نہ ہونے کی وجہ سے تمام تر تفصیلات آئی ایس پی آر کی جانب فراہم کی جاتی ہیں۔
تاہم فوج کی جانب سے آپریشن کے آغاز کے بعد ایک مرتبہ ملکی اور غیرملکی میڈیا کو تحصیل میرعلی کا دورہ کروایا گیا تھا۔
شمالی وزیرستان کی تحصیل میرعلی کو دہشت گردوں سے خالی کروانے کے بعد سیکیورٹی فورسز نے آپریشن کا دائرہ کار شمالی وزیرستان کے دوردراز علاقوں تک بڑھا دیا ہے۔
اور اب خیبر ایجنسی اور ملحقہ علاقوں میں ’آپریشن خیبر ون‘ کے تحت سیکیورٹی فورسز نے اپنی کارروائیاں مزید تیز کردی ہیں۔