آزادی اظہار کا غلط استعمال نہ کیا جائے، پاکستان
توہین آمیز خاکے لوگوں اور تہذیبوں کو منقسم کرنے کی کوشش ہے، ترجمان دفتر خارجہ تسنیم اسلم۔
اسلام آباد: پاکستانی دفتر خارجہ نے منگل کے روز فرانسیسی میگزین میں توہین آمیز خاکوں پر شدید ردعمل کا اظہار کرتے ہوئے کہا کہ آزادی اظہار کا غلط استعمال نہ کیا جائے۔
ایک اعلامیے میں ترجمان تسنیم اسلم نے کہا کہ توہین آمیز خاکے لوگوں اور تہذیبوں کو منقسم کرنے کی کوشش ہے۔
ترجمان کا کہنا ہے کہ دنیا میں بین المذاہب ہم آہنگی کو فروغ دینے کی ضرورت ہے۔
ترجمان نے کہا کہ دوسرے مذاہب پر اپنے آزادی اظہار کا غلط استعمال نہ کیا جائے۔
دوسری جانب مشیر خارجہ سرتاج عزیز نے او آئی سی کے سیکرٹری جنرل کے نام خط ارسال کیا ہے جس میں مطالبہ کیا ہے کہ توہین آمیز خاکے چھاپنے پر فرانسیسی میگزین کے خلاف چارہ چوئی کی جائے اور معافی طلب کی جائے۔
خط میں سرتاج عزیز کا کہنا تھا کہ مغرب میں اسلامو فوبیا کو باقاعدہ جرم قرار دینے کے لیے جوائنٹ ایکشن کیا جائے۔