بولی وڈ کے کامیاب ہدایت کار راج کمار ہیرانی معروف اداکار سنجے دت کی زندگی پر اگلے سال فلم بنائیں گے۔

راج کمار ہیرانی نے پچھلے سال بولی وڈ کی فلم ‘پی کے’ بنائی تھی جو اب تک کی کامیاب ترین فلموں میں سے ایک ثابت ہوئی ہے۔

ذی نیوز کے مطابق راج کمار ہیرانی کا اپنے ایک بیان میں کہنا تھا کہ وہ سنجے دت کی زندگی پر بننے والی فلم کی اسکرپٹ پر کام کر رہے ہیں اور اس فلم کی شوٹنگ اگلے سال شروع کریں گے۔

فلم کی کاسٹ کے حوالے سے راج کمار ہیرانی کا کہنا تھا کہ انہوں نے ابھی تک اس فلم کی کاسٹ کے حوالے سے نہیں سوچا ہے، ایک بار فلم کی اسکرپٹ مکمل ہوجائے تو اس کے بعد وہ اسکرپٹ کے کرداروں کے حساب سے اداکاروں کی کاسٹنگ کریں گے۔

خبروں کے مطابق رنبیر کپور اس فلم میں سنجے کا کردار ادا کریں گے البتہ اس حوالے سے راج کمار ہیرانی کا کہنا تھا کہ ‘’رنبیر وہ واحد اداکار ہیں جن سے میں نے اب تک اس فلم کے بارے میں بات کی ہے’’۔