پاکستان اداکارہ میرا نے بولی وڈ اداکار عامر خان کو ان کے گزشتہ روز کے ملک چھوڑنے اور ہندوستان میں انتہا پسندی بڑھ جانے کے بیان کے بعد لاہور آنے کی دعوت دے دی۔

اداکارہ میرا نے سماجی رابطے کی ویب سائٹ ٹوئٹر پر عامر خان کو لاہور آںے کی دعوت دی ساتھ ساتھ ان کا کہنا تھا کہ عامر ان کے لیے خاندان کے رکن کی طرح ہیں اور وہ لاہور میں ان کے مہمان ہوں گے۔

میرا نے اپنی اس ٹویٹ میں thegreatmeera# کا ٹرینڈ شروع کرنے کی کوشش بھی کی۔

میرا نے اپنی ٹویٹ کا سلسلہ یہاں پر تمام نہیں کیا۔

ایک اور ٹویٹ میں اداکارہ میرا کا عامر خان کو پیغام دیتے ہوئے کہنا تھا کہ وہ انہیں لاہور میں اپنا گھر اور فارم ہاؤس تحفہ میں دے رہی ہیں۔

گزشتہ روز عامر خان نے ایک شو کے دوران ہندوستان میں بڑھتی انتہا پسندی اور عدم برداشت پر تشویش ظاہر کی تھی جس کے بعد ان کے خلاف ہندو انتہا پسند پارٹی بی جے پی کی جانب سے سخت تنقید کا سامنا کرنا پڑا۔