شخصیت کے راز جو ملبوسات کے رنگ کریں فاش

ویسے تو کسی شخص کے بارے میں اسے دیکھ کر جاننا آسان کام نہیں بلکہ اکثر افراد تو کئی ملاقاتوں کے بعد بھی اپنے ساتھیوں کی شخصیت یا ان کی خوبیوں کو جاننے میں ناکام رہتے ہیں۔

مگر کیا آپ کو معلوم ہے کہ ایک بہت عام چیز سے لوگوں کی شخصیت کے راز جانے جاسکتے ہیں؟

جی ہاں وہ ہے ان کے ملبوسات کا رنگ جو بہت کچھ بتاتے ہیں۔

یہاں کچھ ایسی ہی دلچسپ معلومات دی جارہی ہے جن کی تصدیق سائنس بھی کرتی ہے۔

نیلا رنگ

نیوی بلیو رنگ کسی ملازمت کے انٹرویو کے لیے زیب تن کیے جانے والا بہترین رنگ مانا جاتا ہے۔ دو ہزار سے زائد ہائرنگ منیجرز سے ہونے والے سروے کے مطابق نیلے رنگ کے لباس پہن کر انٹرویو دینے والے افراد کو ٹیم پلیئر تصور کیا جاتا ہے۔ یہ رنگ سکون، وفاداری، اعتماد اور کنٹرول کی علامت ہے۔

سرخ رنگ

مختلف سائنسی تحقیقی رپورٹس میں یہ بات سامنے آئی ہے کہ سرخ رنگ رومان کی علامت ہے۔ ایک تحقیق کے دوران جب مرد شرکاءکو مختلف رنگوں کے ملبوسات پہنی ہوئی خواتین کی تصاویر دکھا کر رائے لی گئی تو انہوں نے سرخ لباس زیب تن کرنے والی خواتین کو زیادہ پسند کیا۔

گرے (خاکستری) رنگ

سائنس کا ماننا ہے کہ گرے رنگ قدامت پسندی کی بجائے اعتدال پسندی اور وقار کا احساس دلاتا ہے۔ یعنی اس رنگ کے ملبوسات پسند کرنے والے افراد کسی بھی ماحول میں جلد گھل مل جاتے ہیں اور انہیں کہیں بھی مشکل کا سامنا نہیں ہوتا۔

جامنی رنگ

چونکہ قدرتی ماحول میں یہ رنگ بہت کم ہی نظر آتا ہے اس لیے جامنی رنگ مصنوعی لگتا ہے۔ تاریخی طور پر یہ رنگ طاقت کی نشانی سمجھا جاتا تھا جبکہ ایک سائنسی تحقیق کے مطابق جامنی رنگ کسی فرد کے عدم اطمینان کا اظہار کرتا ہے اور کسی کو قائل کرنے کے لیے اس رنگ کے لباس کا استعمال بیک فائر بھی ثابت ہوسکتا ہے۔

سیاہ رنگ

سر سے پاﺅں تک سیاہ رنگ کا لباس طاقت اور اختیار کا اشارہ دیتا ہے، اس کو پہننے والے باوقار لگتے ہیں، جبکہ دفاتر میں یہ باس کا پسندیدہ رنگ ہوتا ہے۔ تاہم کچھ افراد کے اندر یہ سوگ اور اداسی کے اظہار کی علامت بھی ہوسکتا ہے اور یہ جارحیت پسندی کی نشانی بھی ثابت ہوسکتا ہے۔ ایک تحقیق کے مطابق سیاہ رنگ کے لباس پہننے والی ٹیمیں زیادہ فاﺅلز کرتی ہیں۔

سبز رنگ

اس رنگ کے لباس پسند کرنے والے تخلیقی سوچ کے حامل ہوتے ہیں۔ ایک تحقیق کے مطابق یہ رنگ تخلیقی سوچ کو جلاءدیتا ہے اور وہ زیادہ اچھے کام کرپاتے ہیں۔ کسی کو متاثر کرنے کے لیے بھی یہ رنگ بہترین ثابت ہوتا ہے۔

سفید رنگ

سفید رنگ پسند کرنے والے صاف ستھری شخصیت کے مالک ہوتے ہیں اور انہیں منظم اور نظم و ضبط کے ساتھ زندگی گزارنا پسند ہوتی ہے۔ اس رنگ کو پسند کرنے والے لوگوں میں آسانی سے گھل مل جاتے ہیں۔

آپ موبائل فون صارف ہیں؟ تو باخبر رہنے کیلئے ڈان نیوز کی فری انڈرائیڈ ایپ ڈاؤن لوڈ کریں۔