Dawn News Television

اپ ڈیٹ 20 مارچ 2017 01:47pm

کپل شرما کا سنیل گروور پر حملہ

معروف کامیڈین کپل شرما نے اپنے کامیڈی شومیں کام کرنے والے معروف اسٹارسنیل گروور عرف گتھی کو تشدد کا نشانہ بنانے کے حوالے سے اپنی خاموشی توڑ دی۔

گزشتہ دنوں یہ رپورٹس سامنے آئی تھیں کہ کپل شرما نے آسٹریلیا سے بھارت واپس آتے ہوئے ہوائی پرواز کے دوران سنیلگروور کو تشدد کا نشانہ بنایا تھا۔

تاہم اب کپل شرما نے دعویٰ کیا ہے کہ یہ لڑائی 'اچھے کام' کے لیے تھی۔

اس سے قبل سامنے آنے والی رپورٹس کے مطابق کپل شرما شو کی ٹیم آسٹریلیا میں ایک پرفارمنس ٹور کے بعد سامنے آرہی تھی جب کپل شرما کا ٹیم کے ساتھ جھگڑا ہوگیا۔

اس موقع پر سنیل گروور نے مداخلت کرکے معاملہ حل کرانے کی کوشش کی مگر کپل شرما نے انہیں تشدد کا نشانہ بنایا جبکہ دیگر کھڑے دیکھتے رہے۔

بعد ازاں سنیل گرورو نے پرواز یں موجود مسافروں سے کپل شرما کے رویے پر معذرت بھی کی۔

اس حوالے سے کپل شرما نے ردعمل کا اظہار کرتے ہوئے کہا ' مجھے یاد نہیں، درحقیقت ہماری لڑائی ہر پروازمیں ہوتی ہے، ہر جگہ ہوتی ہے، یہ ایک صحت مندانہ لڑائی ہوتی ہے، ہم کام کے لیے لڑتے ہیں، ہم اچھے کام کے لیے لڑتے ہیں'۔

دوسری جانب ایک رپورٹ میں یہ دعویٰ سامنے آیا ہے کہ سنیل گروور نے حالیہ لڑائی کے بعد کپل شرما شو چھوڑنے کا فیصلہ کرلیا ہے۔

رپورٹ میں بتایا گیا کہ اب وہ واپس اس شو کا حصہ نہیں بنیں گے جنھوں نے رواں ہفتے کے شوز کو تو ریکارڈ کرادیا تھا مگر اب مزید کام نہیں کریں گے۔

واضح رہے کہ کلر چینیل سے جھگڑے کے بعد کپل شرما نے اپنا شو سونی ٹی وی پر شروع کیا تھا اور اس دوران سنیل گروور ان کے ساتھ رہے تھے۔

Read Comments