الرجی کیوں ہوتی ہے؟
نیویارک: الرجی ایک عام مرض ہے، جسے زیادہ تر لوگ کوئی خطرناک مرض نہیں سمجھتے، مگر در حقیقت یہ ایک خطرناک مرض ہے جو نزلہ، زکام، کھانسی، جلد کے امراض سمیت بعض اوقات بڑی جان لیوا بیماریوں کا سبب بھی بنتا ہے۔
الرجی میں مبتلا افراد بظاہر نارمل نظر آتے ہیں، مگر وہ بر وقت ایسی چیزوں سے بچنے کی کوشش کر رہے ہوتے ہیں، جن کے سامنے آتے ہی انہیں الرجی ہونے لگتی ہے۔
تو سوال یہ ہے کہ الرجی ہے کیا اور کیوں ہوتی ہے؟
صحت جرنل میں شائع ایک رپورٹ میں بتایا گیا کہ الرجی دراصل انسان کے مدافعتی نظام کے کمزور ہونے کی وجہ سے ہوتی ہے۔
تو پھر یہ مدافعتی نظام جسے قوت مدافعتی بھی کہا جاتا ہے یہ کیا ہے؟
صحت جرنل میں مدافعتی نظام سے متعلق بتایا گیا کہ یہ ایک بہت ہی پیچیدہ عمل ہے، جو عام افراد کو سمجھ نہیں آتا، لیکن اس کی آسان تشریح یہ ہے کہ یہ انسانی جسم کا وہ حصہ ہے جو جسم کی بیرونی چیزوں سے حفاظت کرتا ہے۔
انسانی جسم میں ایسے سسٹم نصب ہیں جو وائرسز اور بیکٹیریا سے انسانی جسم کو محفوظ رکھتے ہیں، لیکن جب وہ سسٹم کمزور ہوجاتا ہے تو وہ کمزور مدافعتی نظام کہلاتا ہے، اور یوں وائرس اور بیکٹیریاز انسانی جسم میں داخل ہوکے بیماریاں پھیلاتے ہیں۔
الرجی کیوں کیسے ہوتی ہے؟
مدافعتی نظام کے کمزور ہونے کی وجہ سے مٹی، دھول، جانوروں کی جلد کے وائرسز، ہوا میں شامل نمی اور دیگر کئی چیزیں انسانی جسم میں داخل ہوکر ’الرجن‘ کا وائرس پیدا کرتی ہیں، جسے امیونوگلوبلین ای ( آئی جی ای) اینٹی باڈیز بھی کہا جاتا ہے جو بڑھ کر الرجی بن جاتا ہے۔
الرجی کن چیزوں سے ہوتی ہے؟
الرجی ایک حساس بیماری ہے، جو مختلف لوگوں کو بہت ہی حساس اشیاء سے بھی ہوتی ہے۔
الرجی پھولوں سے بھی ہوتی ہے۔
مٹی کے ذرات، اور دھول سے بھی ہوتی ہے۔
روزہ مرہ کے استعمال میں آنے والی چیزوں میں بوسیدہ اور ملی ہوئی چیزوں سے بھی ہوتی ہے۔
جانوروں اور پرندوں کے قریب رہنے سے بھی ہوتی ہے۔
کھانوں اور پھلوں سے بھی ہوتی ہے۔
پالتو جانوروں، جیسے بلیوں اور کتوں سے بھی ہوتی ہے۔
الرجی کے باعث ہونے والی چند اہم بیماریاں
نزلہ، زکام، کھانسی، ناک کا بند رہنا، یا بہتے رہنا۔
سانس ٹھیک سے نہ لے پانا، استھما۔
سینے میں درد۔
خارش، جلد میں خرابی، خشکی، بہت ہی گرمی لگنا، جلد پر سرخ دانے نکلنا۔
سر درد، آنکھوں کا لال رہنا، آنکھوں میں پانی رہنا۔
پیٹ کی خرابیاں، ہاضمے کی شکایات وغیرہ۔
ان بیماریوں یا مسائل کے علاوہ بھی الرجی سے کئی دیگر بیماریاں ہوتی ہیں، مگر فوری طور پر الرجی سے یہ بیماریاں تقریبا ہر اس شخص کو ہوتی ہیں، جو الرجی کا شکار ہوتا ہے۔