ہم 'جنڈی' کے کاریگر ہیں
ہم 'جنڈی' کے کاریگر ہیں
سندھ میں جہاں صدیوں پرانی دستکاری کی گونا گوں مثالیں پائی جاتی ہیں، وہاں جنڈی کا کام ایک الگ انفرادیت کا حامل ہے۔ اس میں لکڑی کو بڑی مہارت و نفاست کے ساتھ رنگین نقوش سے آراستہ کر کے دلکش روپ دے کر تیار کیا جاتا ہے۔ کاریگروں کے ان شاہکارنمونوں کو دیکھ کر ان ہاتھوں کو خراج پیش کرنے کو دل کرتا جو صدیوں سے اس ہنر کو آج بھی زندہ رکھے ہوئے ہیں۔
جنڈی لفظ جنڈ سے اخذ کیا گیا ہے، جس کی معنی چکر لگانا یا گھومنے والے سے ہیں۔ جنڈ سندھی میں ہاتھ سے چلنے والی چکی کو کہا جاتا ہے۔ جیسا کہ اس کام میں لکڑی کو تراش خراش کر گھما کر پھر مخلتف چیزیں بنائی جاتی ہیں، اس لیے اس ہنر کو جنڈی کا ہنر کہا جاتا ہے۔ جنڈی سے بننے والی چیزوں میں لکڑی سے جھولے، چارپایاں، موڑے، ڈریسنگ ٹیبل اور دیگر اشیاء شامل ہیں۔ ان پر ہاتھ سے نقش و نگار بنائے جاتے ہیں، رنگوں کے حسین امتزاج اور پھولوں کے نقوش بنا کر یہ کاریگر اپنے فن کے عمدہ نمونوں کو مارکیٹ میں بھیج دیتے ہیں۔