بلوچستان: دھماکے میں اے این پی کے رہنما سمیت 2 جاں بحق
کوئٹہ: صوبہ بلوچستان کے ضلع ہرنائی میں بم دھماکے سے نیشنل عوامی پارٹی (اے این پی) کے مقامی رہنما اور ان کے بھائی جاں بحق ہوگئے۔
ہرنائی کے ڈپٹی کمشنر عبدالسلام اچکزئی نے بتایا کہ ہرنائی کے علاقے شاہرگ میں ہونے والے بم دھماکے میں اے این پی کے رہنما عبدالرزاق اور ان کا بھائی جاں بحق ہوئے۔
مزید پڑھیں: کوئٹہ: پولیس ٹرک کے قریب دھماکا، 7 افراد جاں بحق
انہوں نے بتایا کہ مقتولین پشین میں ایک عوامی جلسے میں شرکت کے لیے جارہے تھے جب دھماکے میں ان گاڑی کو نشانہ بنایا گیا۔
ڈپٹی کمشنر کا کہنا تھا کہ بظاہر بم سڑک کنارے نصب تھا جسے اے این پی کے رہنما کی گاڑی کے قریب آنے پر دھماکے سے اڑا دیا گیا۔
انہوں نے بتایا کہ دھماکے میں اے این پی کے رہنما کی گاڑی مکمل تباہ ہوگئی۔
واقعے کے فوری بعد لیویز اور پولیس نے جائے وقوع کا دورہ کیا اور لاشوں کو ہسپتال منتقل کرکے تحقیقات کا آغاز کردیا گیا۔
خیال رہے کہ حالیہ کچھ سالوں میں بلوچستان میں دہشت گردی، فرقہ وارانہ اور دیگر جرائم کی کارروائیوں میں اضافہ ہوا ہے جس میں سیکڑوں افراد ہلاک ہوچکے ہیں۔
یہ بھی پڑھیں: کوئٹہ: اسکول بس کے قریب دھماکا، ڈرائیور زخمی
اس حوالے سے صوبائی حکومت متعدد مرتبہ یہ دعویٰ کرچکی ہے کہ بھارت کی خفیہ ایجنسی ’را‘، افغانستان کی خفیہ ایجنسی ’این ڈی ایس‘ کے ساتھ مل کر پاکستان کو غیر مستحکم بنانے کی سرگرمیوں میں ملوث ہے۔
یاد رہے کہ بلوچستان کے ساحلی پورٹ شہر گوادر سے متعدد راستوں کے ذریعے چین سے تجارت بڑھانے کے لیے پاک-چین اقتصادی راہداری منصوبے پر کام جاری ہے جس کے تحت بلوچستان سمیت دیگر صوبوں میں ترقیاتی کام جاری ہیں، اس منصوبے کے حوالے سے دعویٰ کیا جارہا ہے کہ یہ خطے اور خاص طور پر پاکستان میں معاشی تبدیلی کا باعث ہوگا۔