نیروبی: ہفتوں سے جاری شدید بارشوں سے جنوبی کینیا کے علاقے سولائی میں قائم ڈیم ٹوٹ گیا، جس کے نتیجے میں آنے والے سیلاب سے آس پاس کے علاقوں میں شدید تباہی پھیل گئی۔

ڈیم ٹوٹنے سے سیلاب کی زد میں آنے والے 2 گاؤں صفحہ ہستی سے مٹ گئے جس کے نتیجے میں 500 خاندان بے گھر ہوگئے۔

برطانوی نشریاتی ادارے بی بی سی کے مطابق کینیا کے مقامی اخبار نے بتایا کہ ڈیم ٹوٹنے کے سبب بننے والی پانی کی لہریں 1.5 میٹر بلند اور 500 میٹر طویل تھیں، کینیا کے حکام کا اس سلسلے میں کہنا تھا کہ ڈیم غیر قانونی طور پر ایک فارم ہاؤس کے مالک نے بنایا تھا، ڈیم ٹوٹنے کے سبب تقریباً 70 لاکھ لیٹر پانی کا اخراج ہوا ،واقعے کے خلاف تحقیقات کا آغاز کردیا گیا ہے۔

اس حوالے سے کینیا ملٹری اور ریڈ کراس کے رضاکاروں کا کہنا تھا کہ انہوں نے پانی کی سطح پر آنے والی لاشوں کو نکال لیا تھا، لیکن اب مزید لاشوں کی تلاش کے لیے کیچڑ میں کھدائی کی جائے گی، 40 افراد تاحال لاپتہ ہیں، تفصیلات میں یہ بات سامنے آئی کہ کچھ دن پہلے ہی مقامی افراد کی جانب سے ڈیم کی دیواروں میں دراڑیں پڑنے کی شکایت کی گئی تھی۔