اسلام آباد ہائی کورٹ نے ڈان اخبار کی ایڈیٹوریل پالیسی کے خلاف درخواست کو 'ناقابل سماعت' قرار دیتے ہوئے مسترد کردیا۔

سول سوسائٹی آف پاکستان نے چیئرمین محمد طاہر کے ذریعے ڈان کے خلاف ہائی کورٹ میں درخواست دائر کی تھی، جس میں اخبار کے طرز عمل پر سوالات اٹھاتے ہوئے اس کی پالیسیوں کو 'ریاست مخالف' قرار دیا گیا تھا اور عدالت سے ان پالیسیوں کو تشکیل دینے والوں کو سامنے لانے کے درخواست کی گئی تھی۔

درخواست گزار کی جانب سے ایڈووکیٹ طاہر عبداللہ عدالت کے روبرو پیش ہوئے۔

جسٹس محسن اختر کیانی پر مشتمل ہائی کورٹ کے ایک رکنی بینچ نے درخواست کو ناقابل سماعت قرار دیتے ہوئے اسے مسترد کردیا۔

جسٹس محسن اختر کیانی نے درخواست گزار سے کہا کہ وہ معاملے پر متعلقہ فورم 'پریس کونسل آف پاکستان' سے رجوع کرے۔