مقبوضہ کشمیر میں بھارتی حکومت کی جانب آرٹیکل 370 کے خاتمے اور کرفیو کے نفاذ کے ایک ہفتے بعد مسلسل دوسرے روز بھی احتجاج کیا گیا جبکہ فورسز نے مظاہرین پر فائرنگ کی جس کے نتیجے میں متعدد افراد زخمی ہوگئے۔

رپورٹس کے مطابق سری نگر میں ہزاروں افراد نے بھارت کے خلاف شدید نعرے بازی کی اور آزادی کے نعرے لگائے، نوجوانوں نے ٹائر نذر آتش کیے اور پولیس کی فائرنگ کے جواب میں پتھراؤ کیا۔

مقبوضہ کشمیر میں ہفتے کو کرفیو میں معمولی نرمی کی گئی تھی تاکہ عوام کھانے پینے کی اشیا حاصل کرسکیں جس کے بعد دکانوں میں شہریوں کی قطاریں لگ گئیں۔

شہریوں نے اس موقع پر بھارتی حکومت کے اقدام کو نفرت انگیز قرار دیتے ہوئے کہا کہ وادی کے حالات بدستور خراب ہیں اور ہمیں مزید خدشات ہیں لیکن یہ حالات اس وقت تک ٹھیک نہیں ہوسکتے جب تک بھارت کشمیریوں کا جائز حق نہیں دیتا۔