پاکستانی نژاد برطانوی باکسر عامر خان اور اہلیہ فریال مخدوم کے ہاں تیسرے بچے کی پیدائش متوقع ہے جس کا اعلان دونوں نے ایک دلچسپ ویڈیو کے ساتھ انٹرنیٹ پر کیا۔

عامر خان کی اہلیہ فریال مخدوم نے اپنے انسٹاگرام اکاؤنٹ پر شیئر کردہ ویڈیو میں صرف یہی اعلان نہیں کیا کہ وہ تیسری مرتبہ ماں بننے والی ہیں بلکہ انہوں نے ایک دلچسپ انداز میں لوگوں کو یہ بھی بتا دیا کہ اس مرتبہ ان کے ہاں بیٹا ہونے والا ہے۔

یہ بھی پڑھیں: باکسر عامر خان کے ہاں ننھی پری کی آمد

اس سے ایک روز قبل فریال مخدوم نے اپنے انسٹاگرام اکاونٹ پر اپنی اور عامر خان کی ایک تصویر بھی شیئر تھی جس پر انہوں نے لکھا تھا کہ وہ سب سے ایک خاص خبر شیئر کرنا چاہتی ہیں جبکہ انہوں نے لوگوں سے اندازہ لگانے کو بھی کہا تھا۔

اس تصویر میں عامر اور فریال دونوں سرخ رنگ کے ملبوسات میں ایک ریڈ کارپٹ پر موجود تھے جس کے باعث لوگوں کو ایسا لگا کہ فریال کسی نئے پروجیکٹ پر کام کرنے کا اعلان کرنے جارہی ہیں۔

خیال رہے کہ عامر خان اور فریال مخدوم کی شادی 2013 میں ہوئی تھی، جس کے بعد 2014 میں ان کی پہلی بیٹی لمائسا خان کی پیدائش ہوئی۔

ان کے ہاں دوسری بیٹی کی پیدائش گزشتہ سال 24 اپریل کو ہوئی تھی جس کا نام انہوں نے علینا خان رکھا۔

واضح رہے کہ فریال مخدوم ماڈلنگ کے شعبہ سے وابستہ رہی ہیں، عامر اور فریال کے درمیان ہوئے کئی تنازعات بھی ماضی میں سامنے آئے جبکہ فریال مخدوم اپنے خاوند کے اہل خانہ پر تشدد کا الزام بھی لگا چکی ہیں۔

مزید پڑھیں: غلط فہمیاں دور: عامر اور فریال میں صلح ہوگئی

2017 میں عامر خان اور فریال مخدوم کے درمیان جھگڑا اس حد تک بڑھ گیا تھا جس کے بعد ان دونوں نے علیحدہ ہونے کا اعلان بھی کیا، البتہ اس اعلان کے چند روز بعد فریال نے اپنے ماں بننے کی خبر کا اعلان کیا جس کے بعد دونوں کے درمیان صلح ہوگئی۔

عامر خان نے اہلیہ کے ساتھ ایک تصویر شیئر کرتے ہوئے اعلان کیا تھا کہ 'غلط فہمیاں دور ہونے اور مسائل حل کرنے کے بعد اپنی 4 ماہ کی حاملہ اہلیہ کے ساتھ ہوں'۔