پاکستان میں بچوں کے لیے خصوصی ٹی وی پروگرام کیوں نہیں بنتے؟

نقطہ نظر

پاکستان میں بچوں کے لیے خصوصی ٹی وی پروگرام کیوں نہیں بنتے؟

’یہ ایک ایسا کام ہے جس میں بڑوں کو ایک بچے کے ذہن اور خیالات کو مدِنظر رکھتے ہوئے معقول فیصلے کرنے ہوتے ہیں۔‘

’بچوں کے لیے ٹی وی پروگرامز بنانا دنیا کا مشکل ترین کام ہے‘، یہ جملہ تھا فاروق قیصر کا جنہوں نے مجھے ایک شام فون پر بات کرتے ہوئے کہا۔ قیصر کو اگر آپ نہیں جانتے تو ہم آپ کو بتاتے چلیں کہ یہی وہ صاحب ہیں جنہوں نے انکل سرگم، مائی مصیبتے اور رولا جیسے پروگرام بنائے، صرف یہی نہیں بلکہ وہ دیگر ان پپٹس کے میزبان بھی رہے ہیں جو 3 دہائیوں پہلے پاپ کلچر کی علامت بن گئے تھے۔

وہ اپنی بات کو آگے بڑھاتے ہوئے کہتے ہیں کہ ’یہ ایک ایسا کام ہے جس میں بڑوں کو ایک بچے کے ذہن اور خیالات کو مدِنظر رکھتے ہوئے معقول فیصلے کرنے ہوتے ہیں۔‘ یہ کام اپنے جوتے کے سائز کے مقابلے میں 5 گنا چھوٹے رنگ برنگے جوتے میں پیر ڈالنا جیسا ہی ہے۔

قیصر کہتے ہیں کہ ’پھر ان پروگراموں کو کارآمد بنانے کا تو معاملہ ہی الگ ہے اور یہ کام 70 کی دہائی کے مقابلے میں آج اور بھی زیادہ مشکل بن چکا ہے۔‘

انکل سرگرم پہلی بار پی ٹی وی پر بچوں کے ایک پروگرام کلیاں میں جلوہ گر ہوئے تھے، پھر برسوں بعد انہوں نے ڈان نیوز پر نشر ہونے والے پروگرام سیاسی کلیاں میں اپنی توجہ کا مرکز بالغین کو بنایا۔ آج انکل سرگرم بیتے وقت کی بچی کچھی نشانی اور سادہ اور کم کمرشل دور کی یاددہانی ہیں۔

قیصر کے مطابق جیسے جیسے وقت گزرتا جارہا ہے، ویسے ویسے ٹی وی پروگرامز سے متعلق بچوں کی پسند، ناپسند اور ان کے مزاج میں بھی تبدیلی آتی جارہی ہے۔ پھر پرانے وقتوں کی طرح بچوں کے لیے خصوصی پروگرام ترتیب دینے کا سلسلہ تو تقریباً ختم ہی ہوگیا ہے۔

ایک وقت تھا جب سرکاری ٹی وی ہی ٹی وی تفریح کا واحد ذریعہ ہوا کرتا تھا۔ پورے دن کی نشریات میں الگ الگ مواد پر مشتمل پروگرام کے لیے وقت مقرر ہوتا تھا۔ کامیڈی، ڈراموں، انفوٹینمنٹ (اس زمانے میں اسے ڈاکومینٹری پکارا جاتا تھا) اور بچوں کے پروگرام کے لیے خاص وقت مختص ہوتا تھا۔

ہفتے میں ایک دن عام طور پر 4 سے 5 بجے کے دوران پی ٹی وی پر بچوں کے لیے کارٹون، ڈرامے (بہادر علی، عینک والا جن) اور میوزک (مثلاً سنگ سنگ چلیں) و مختلف نوعیت کے پروگرام نشر ہوا کرتے تھے۔ ان پروگراموں کا مقصد سیدھا سادہ تھا: بچوں کو ہلکے پھلکے انداز میں تعلیم و آگہی دینا۔

جیسے ہی 80 کی دہائی کے بعد 90 کی دہائی کی ابتدا ہوئی اور (ایس ٹی این پر نشر ہونے والے) پاکستان کے پہلے نیم نجی نیٹ ورک این ٹی ایم کی آمد ہوئی تو تخلیقی (یا برآمد شدہ) مواد کے حوالے سے خیالات اگلے کم از کم چند برسوں تک تو ویسے ہی رہے۔ لیکن پھر مارکیٹنگ کے دور کا آغاز ہوا، جو بچوں کے خصوصی پروگراموں کو کھا گیا۔

دنیا میں یہ عام رواج ہے کہ بچوں اور بڑوں سے متعلق پروگراموں کے لیے وقت تقسیم ہوتا ہے۔ بھارت کے سرکاری چینل دور درشن نے بھی یہی طریقہ اپنایا ہوا ہے، جبکہ میچور مارکیٹ ہونے کے باوجود امریکی ٹی وی نے بھی بچوں کے لیے ایک خاص وقت مختص کر رکھا ہے۔ اگرچہ امریکی ٹی وی کو چلڈرن ٹیلی وژن ایکٹ (جسے کڈ وِڈ رولز کے نام سے بھی جانا جاتا ہے) کی صورت میں سخت ضابطوں کا سامنا تھا مگر بدلتے وقت نے امریکی ٹی وی صنعت کو بھی بدل کر رکھ دیا۔

آج تو معاملہ یہ ہے کہ کارٹون نیٹ ورک اور نکلوڈین جیسے چینلوں، یوٹیوب، نیٹ فلکس یا موشن پکچرز جیسے دیگر انٹرنیٹ پلیٹ فارمز پر 24 گھنٹے بچوں کے لیے مواد دستیاب ہے۔

ممکن ہے یہ آپ کو کامیابی نظر آئے لیکن اتنی جلدی جشن مت منائیے۔ اگر آپ صنعت سے وابستہ سینئر شخصیات یا پھر ایسے افراد جنہوں نے 3 دہائیوں قبل اپنے بچپن کے دن دیکھے ہیں، ان سے پوچھیں گے تو آپ کو ناکامی کا صدمہ محسوس ہوگا۔

سینئر پروڈیوسر و ہدایت کار اور بچوں کے لیے اصلی پروگرام مرتب کرنے سے متعلق زور دینے والی مصباح خالد کو شکایت ہے کہ ملک میں مقامی سطح پر تیار ہونے والے ایسے مواد کی شدید کمی ہے کہ جس سے بچوں کے لیے تعلق بنانا آسان ہو۔

انہوں نے اسپین سے بھیجے گئے اپنے آڈیو پیغام میں کہا کہ ’ہمیں بچوں کے لیے ایسے پروگرام بنانے ہوں گے جو ان کی توجہ حاصل کرسکیں۔ ایسا بہت سارا مواد دستیاب ہے جس کی نہ صرف تعلیم دی جاسکتی ہے بلکہ دلچسپ اندز میں انہیں بہت کچھ سیکھایا بھی جاسکتا ہے۔‘ ٹی وی پر نظر آنے والے اینیمیٹڈ کردار ہماری حساس طبیعت اور مزاج سے تعلق قائم ہی نہیں کرپاتے۔

وہ مزید کہتی ہیں کہ ’ایک بچے کے طور پر آپ ایسی بہت سی باتیں سیکھتے ہیں جو آپ کی شخصیت پر اثر انداز ہوتی ہیں۔ اگر ہم چاہتے ہیں کہ ہمارے بچے بڑے ہوکر ذمہ دار اور تعلیم یافتہ فرد بنیں تو ہمیں اس کی تیاری ان کے بچپن سے ہی شروع کرنی ہوگی۔ اسی عمر میں ہمیں انہیں صحیح اور غلط میں تمیز، اخلاقیات، اچھی باتوں اور دیگر عوامل کا درس دینا ہوگا تاکہ وہ دنیا میں ایک بہتر شہری کے طور پر زندگی گزار سکیں۔‘

خالد انعم کہتے ہیں کہ ’کون سا مواد تیار کیا جانا ہے اس کا فیصلہ نجی چینلوں میں تو بالخصوص مارکیٹنگ اور سیلز کا شعبہ ہی کرتا ہے، جبکہ یہاں ان ملٹی نیشنل کاروباری اداروں کی جانب سے بھی بچوں کے پروگراموں کو ترتیب دینے سے متعلق کوئی زور نہیں ڈالا جاتا جن کے اشتہارات ان چینلوں کو بحال رکھنے میں اہم کردار ادا کرتے ہیں۔

مصباح خالد کی طرح خالد انعم بھی بچوں کے لیے خصوصی پروگرام ترتیب دینے کی بھرپور حمایت کرتے ہیں۔

انہوں نے فون پر آئی کون (Icon) کو بتایا کہ ’(پی ٹی وی کے زمانے کے بعد سے) ہمیں اب یہ معلوم ہی نہیں ہوتا کہ ٹی وی اسٹیشن پر انچارج کون ہے؟ جب سے 24 گھنٹے نشریات کا بازار گرم ہوا ہے تب سے صورتحال اب مکمل طور پر تبدیل ہوگئی ہے۔ اب اسکرین پر دکھائے جانے والے مواد سے زیادہ اہمیت کاروبار اور انتظامیہ کو حاصل ہوچکی ہے۔‘

خالد انعم کہتے ہیں کہ ابتدائی طور پر تو جیو اور اے آر وائے نے بچوں کے لیے خصوصی پروگرام نشر کیے لیکن پھر انہوں نے یکایک یہ سلسلہ بند کردیا۔

دنیا بھر میں بچوں کے لیے پروگراموں کو ترتیب دینے کا کام اربوں ڈالر کی صنعت کی حیثیت رکھتا ہے لیکن بدقسمتی سے ہم اپنی تنگ نظری کے باعث اس سے فائدہ ہی نہیں اٹھا پا رہے۔‘

مصباح خالد اور خالد انعم کے مطابق حکومت نے بچوں کے لیے خصوصی چینل کے آغاز کی پیش کش تو کی لیکن یہ اب تک محض زبانی کلامی باتیں ہی ثابت ہوئی ہیں۔

جیو انٹرٹینمنٹ کے گروپ منیجنگ ڈائریکٹر عبداللہ کدوانی سے ہونے والی تفصیلی گفتگو میں انہوں نے کہا کہ ’ٹی وی چینلوں سے لے کر انفرادی حیثیت میں لوگ بچوں سے متعلق پروگرامات کو مرتب کرنے کی کوشش کرچکے ہیں، لیکن اس حوالے سے سب سے پریشان کن بات پروگرام کو ترتیب دینا یا اس کی تخلیق نہیں بلکہ اس کا معیار ہے۔‘

پی ٹی وی پر نشر ہونے والے پروگرام کلیاں کے کردار انکل سرگم اور ماسی مصیبتی

کدوانی کا کہنا ہے کہ ’آج کل کے بچے زیادہ متحرک اور زیادہ سوچتے ہیں۔ وہ اب 20 سال پرانے ٹی وی پروگرام دیکھنے کے عادی نہیں رہے۔ اِس دور میں وہ عینک والا جن یا کلیاں نہیں دیکھنا چاہیں گے۔ ان کی سوچ و تخیل کا دائرہ کافی وسیع ہوچکا ہے، اب بچے یوٹیوب، غیر ملکی چینلز اور فلمیں دیکھتے ہیں۔ اب تو ہر تفریحی و معلوماتی پلیٹ فارم بچوں کی دسترس میں ہے، خواہ وہ پلیٹ فارم ڈیجیٹل ہو یا کوئی دوسرا۔‘

وہ اپنی بات کو آگے بڑھاتے ہوئے کہتے ہیں کہ ’اگر میں نے بچوں کے پروگرام بنانے کی کوشش کی تو مجھے 2 مسائل کا سامنا ہوگا۔ نمبر ایک، اگر مجھے ٹی وی پر بچوں کا کوئی پروگرام تیار کرنا پڑا تو مجھے بین الاقوامی معیار کی پروڈکشن کو یقینی بنانا ہوگا، اور اس کام کے لیے مجھے ایسے لوگ درکار ہوں گے جنہیں یہ کام بخوبی آتا ہو، کیونکہ میں چاہوں گا کہ وہ پروگرام بچے بھرپور دلچسپی کے ساتھ دیکھیں۔ جبکہ دوسرے مسئلے کا تعلق بجٹ سے ہے۔ میں بچوں کے پروگرام پر 20 یا 30 لاکھ روپے کی سرمایہ کاری نہیں کرسکتا۔ بدقسمتی سے پاکستان میں ہمارے پاس ایسا کوئی طریقہ کار رائج نہیں جس کے تحت اشتہار دینے والوں سے پیشگی رقم حاصل کی جاسکتی ہو، کیونکہ عام طور پر اشتہار دینے والے اسی وقت اشتہار دیتے ہیں جب پراڈکٹ کامیابی کی منزل کو طے کرلیتا ہے۔‘