'باجی' مداحوں کو دوبارہ محظوظ کرنے کے لیے تیار
لولی وڈ کوئین میرا کی دنیا بھر میں کامیاب ہونے والی فلم 'باجی' کو رواں سال دسمبر میں واپس سینما گھروں میں نمائش کے لیے پیش کرنے کا فیصلہ کرلیا گیا ہے۔
اداکارہ میرا نے اپنے انسٹاگرام اکاؤنٹ پر ایک ویڈیو شیئر کی، جس میں ان کی دوست اداکارہ و فیشن پروڈیوسر فریحہ الطاف موجود ہیں۔
مزید پڑھیں: میرا کی 'باجی' اب وینکور جانے کو تیار
اس ویڈیو میں فریحہ الطاف نے اعلان کیا کہ فلم باجی رواں سال دسمبر میں دوبارہ سینما اسکرینز پر نمائش کے لیے پیش کی جائے گی۔
ان کا کہنا تھا کہ اس فلم کو صرف پاکستان میں ہی نہیں دنیا بھر میں پسند کیا گیا تھا جبکہ اس کی کاسٹ میں بھی پاکستان کے شاندار اداکار موجود ہیں۔
خیال رہے کہ فلم باجی رواں سال 28 جون کو سینما گھروں میں نمائش کے لیے پیش کی گئی تھی۔
میرا کے کردار شمیرا کو بڑھتی عمر کے باعث فلموں میں کردار ملنے پر مشکلات کا سامنا ہونا شروع ہوا، اس کے باوجود انہوں نے اپنے کیریئر کو آگے لے جانے کا ارادہ برقرار رکھا، بعدازاں بیوٹی پارلر میں کام کرنے والی ایک لڑکی نیہا (آمنہ الیاس) انہیں پسند آتی ہے جسے وہ اپنا مینجر بنا لیتی ہیں۔
نیہا اپنا کام اس بہترین انداز سے نبھانے لگتی ہے کہ شمیرا کو واپس اسکرینز پر جگہ ملنے لگتی ہے لیکن اپنی جگہ کھونے کے ڈر سے شمیرا احساس کمتری کا شکار ہونے لگتی ہے اور نیہا کو اس کا ذمہ دار ٹھہراتی ہے۔
یہ بھی پڑھیں: میرا کی فلم 'باجی' نے کینیڈا میں دو ایوارڈز جیت لیے
واضح رہے کہ رواں سال اگست میں فلم 'باجی' نے موسیک انٹرنیشنل ساؤتھ ایشین فلم فیسٹیول میں دو ایوارڈز حاصل کیے تھے۔
فلم میں میرا اور آمنہ الیاس کے ساتھ عثمان خالد بٹ اور علی کاظمی نے بھی اہم کردار نبھایا۔
'باجی' کو ریلیز کے بعد شائقین اور تجزیہ کاروں دونوں کا مثبت ردعمل موصول ہوا۔
اس فلم کی کہانی عرفان احمد نے تحریر کی جبکہ اس کی ہدایات ثاقب ملک نے دی ہے۔