’نیٹ فلیکس‘گولڈن گلوب ایوارڈز کی 34 نامزدگیاں حاصل کرنے میں کامیاب
’آسکر‘ کے بعد فلمی دنیا کے دوسرے معتبر ترین ایوارڈ کا اعزاز رکھنے والے ’گولڈن گلوب‘ ایوارڈز 2020 کی نامزدگیوں کا اعلان کردیا گیا۔
پہلی بار ’گولڈن گلوب ایوارڈز‘ کے لیے ہولی وڈ کی روایتی فلموں کے بجائے ویب اسٹریمنگ کمپنی ’نیٹ فلیکس‘ کی فلمیں اور ڈرامیں بڑی نامزدگیاں حاصل کرنے میں کامیاب ہوئی ہیں۔
چند سال قبل تک روایتی طریقے سے بننے والی فلمیں اور ڈرامیں گولڈن گلوب کی نامزدگیوں میں سب سے آگے تھے، تاہم اب نیٹ فلیکس کے ڈرامے اور فلمیں سب سے آگے ہیں۔
77 ویں گولڈن گلوب کی 25 کیٹیگریز کی اہم ترین کیٹیگریز میں ’نیٹ فلیکس‘ کی فلمیں اور ڈرامے نامزد ہوئے ہیں جب کہ مجموعی طور پر اس کمپنی کے ڈراموں اور فلموں کو 34 نامزدگیاں ملی ہیں۔
حیران کن بات یہ ہے کہ اس بار بھی گولڈن گلوب کی بہترین ہدایت کار کی کیٹیگری میں کسی بھی خاتون ہدایت کار کو نامزد نہیں کیا گیا۔
مجموعی طور پر 25 کیٹیگریز کا اعلان کیا گیا ہے اور جیتنے والے افراد، فلموں اور ڈراموں کو آئندہ سال 5 جنوری کو ایوارڈز دیے جائیں گے۔
77 ویں گولڈن گلوب کی تقریب کیلیفورنیا میں ہوگی اور اس بار بھی کامیڈین رکی گرویس تقریب کی میزبانی کریں گے۔