خیبر پختونخوا کے ضلع شانگلہ میں کورونا وائرس کا تیسرا مثبت کیس سامنے آگیا۔

ڈپٹی کمشنر شانگلہ عمران حسین رانجھا کے مطابق کروڑہ کے علاقہ کنڈر سے تعلق رکھنے والے حسن شریف میں کرونا وائرس کی تصدیق ہوئی ہے جو تبلیغی جماعت کے رکن ہیں۔

متاثرہ مریض چند روز قبل رحیم یار خان سے شانگلہ آیا تھا جس کے بعد کروڑہ ہسپتال میں ان کے نمونے لیے گئے تھے جہاں آج ان کا کورونا وائرس ٹیسٹ مثبت آیا ۔

کووِڈ 19 کی تصدیق کے بعد حسن شریف کے محلے کو سیل کر کے پولیس کی بھاری نفری تعینات کردی گئی ہے اور مقامی مسجد کو بھی سیل کردیا گیا ہے۔

اس کے علاوہ کروڑہ کی مختلف مساجد سے اعلانات بھی کئے گئے کہ حسن شریف سے ملنےوالے لوگ دیہی مرکز صحت کروڑہ تشریف لے جائیں تاکہ ان کی سکریننگ ہوسکے۔