پاکستانی نژاد برطانوی باکسر 33 سالہ عامر خان کی لگژری کار انگلینڈ میں بدترین روڈ حادثے کا شکار ہوگئی۔

برطانوی اخبار دی سن کے مطابق عامر خان نے 15 نومبر کو اپنی انسٹاگرام اسٹوری میں بدترین حادثے کی تصاویر اور ویڈیوز شیئر کرتے ہوئے مداحوں کو بتایا کہ حادثہ کس قدر خطرناک تھا۔

رپورٹ میں بتایا گیا کہ عامر خان کی تقریباً 2 کروڑ پاکستانی روپے مالیت کی لگژری مرسڈیز ایس 350 کار تیز رفتاری کے باعث خطرناک حادثے کا شکار ہوئی۔

عامر خان کی گاڑی رگبی سے برمنگھم جانے والے ایم سکس موٹروے پر بدترین حادثے کا شکار ہوئی۔

عامر خان نے اپنی اسٹوری میں واضح کیا کہ بدترین حادثے میں وہ خیریت سے رہے، تاہم حادثہ اس قدر خطرناک تھا کہ انہیں لگا کہ شاید گاڑی دو مرتبہ کسی چیز سے ٹکرائی ہے۔

پاکستانی نژاد باکسر نے بتایا کہ تیز رفتاری کے باعث گاڑی ان کے کنٹرول سے باہر ہوگئی اور وہ موٹروے کے بیریئر سے جاٹکرائی اور گاڑی کا اگلا حصہ مکمل طور پر تباہ ہوگیا۔

یہ بھی پڑھیں: باکسر عامر خان کی کورونا متاثرین کیلئے بڑی پیشکش

باکسر کی جانب سے شیئر کی گئی گاڑی کی تصاویر سے پتا چلتا ہے کہ حادثہ شدید تھا۔

ابھی یہ واضح نہیں ہے کہ عامر خان کے ساتھ گاڑی میں اور کون سفر کر رہا تھا، تاہم باکسر نے واضح کیا کہ وہ خیریت سے ہیں۔

خیال رہے کہ عامر خان کی گاڑی پہلے بھی روڈ حادثے کا شکار ہوچکی ہے، تاہم خوش قسمتی سے پہلے بھی صرف ان کی گاڑی کو ہی نقصان پہنچا تھا۔

عامر خان اپنی قیمتی اور مہنگی ترین گاڑیوں کی وجہ سے شہرت رکھتے ہیں، انہوں نے حادثے کا شکار مذکورہ گاڑی کو 2 سال قبل خریدا تھا جب کہ رواں سال انہوں نے مرسڈیز کے نئے ماڈل کی مہنگی کار بھی خریدی تھی۔

مزید پڑھیں: باکسر عامر خان کا لائن آف کنٹرول کا دورہ کرنے کا اعلان

عامر خان کے پاس کروڑوں روپوں کی مالیت کی لمبرگینی سمیت دیگر قیمتی گاڑیاں موجود ہیں اور وہ اپنی گاڑیوں کے ساتھ تصاویر کو سوشل میڈیا پر شیئر کرتے رہتے ہیں۔

حال ہی میں انہوں نے انکشاف کیا تھا کہ وہ مزید ڈھائی لاکھ پاؤنڈ یعنی پاکستانی تقریباً 5 کروڑ روپے نئی لگژری گاڑی خریدنے پر خرچ کریں گے۔

عامر خان نے 2011 میں پاکستانی نژاد برطانوی ماڈل فریال مخدوم سے شادی کی تھی اور ان سے تین بچے بھی ہیں، وہ پاکستان میں مختلف سماجی مسائل پر کام بھی کرتے ہیں۔

عامر خان متعدد بار پاکستان کا دورہ کر چکے ہیں اور وہ پاکستان میں باکسنگ سمیت مختلف سماجی مسائل اور اسپورٹس کی بہتری کے لیے کام کرنے کے خواہاں ہیں۔