پاکستان کے مقبول اداکار عثمان خالد بٹ نے سوشل میڈیا پر اپنی شادی سے متعلق زیر گردش افواہوں اور قیاس آرائیوں کی تردید کردی۔

گزشتہ دنوں سوشل میڈیا پر اداکار عثمان خالد بٹ اور اداکارہ سدرہ نیازی کی تصاویر وائرل ہوئی تھیں جن میں دونوں عروسی لباس میں اسٹیج پر بیٹھے نظر آرہے تھے۔

وائرل ہونے والی تصاویر میں عثمان خالد بٹ کوپر رنگ کی شیروانی جبکہ اداکارہ سدرہ نیازی سرخ رنگ کا عروسی جوڑا پہنے ہوئی تھیں۔

مزید پڑھیں: عثمان خالد بٹ سے شادی؟ مایا علی کا جواب سامنے آگیا

دونوں کی تصاویر سوشل میڈیا پر وائرل ہونے کے بعد مداحوں کی جانب سے قیاس آرائیاں کی جارہی تھیں کہ شاید اداکار خاموشی سے شادی کے بندھن میں بندھن گئے ہیں جبکہ کچھ کا خیال تھا کہ یہ کسی ڈرامے کی شوٹنگ کی تصاویر ہیں۔

جس کے بعد اداکار عثمان خالد بٹ نے انسٹاگرام پر ایک تصویر شیئر کرتے ہوئے اپنی شادی سے متعلق افواہوں کی تردید کی۔

اداکار نے ڈرامے کے سین کی تصویر شیئر کرتے ہوئے طنزیہ انداز میں لکھا کہ 'میری شادی اتنی جلدی ہوئی کہ سنگل شاٹ میں ہی ہوگئی'۔

عثمان خالد بٹ نے لکھا کہ میں حیران رہ گیا کہ میرے دوست اور عزیز و اقارب مجھے مختلف نیوز چینلز اور بلاگز کے اسکرین شاٹس بھیج رہے تھے۔

اداکار نے یہ بھی بتایا کہ 'میری بہن نے کیک پر یہ پیغام لکھ کر بھیجا کہ کیا مجھے تمہاری کسی ایک شادی پر مدعو کیا جا سکتا تھا؟'

یہ بھی پڑھیں: احد رضا میر اور عثمان خالد بٹ کی 'لازوال دوستی'

عثمان خالد بٹ نے مزید لکھا کہ میں جانتا ہوں جب انڈسٹری کے سینئرز اور دیگر رشتہ دار مبارکباد دینا شروع کر دیں تو وضاحت ضروری ہوجاتی ہے۔

اداکار نے اپنی پوسٹ میں بتایا کہ یہ ان کے آنے والے ڈرامے 'چپکے چپکے' میں شادی کے ایک سین کی ریکارڈنگ کی تصویر ہے۔

خیال رہے کہ اس سے قبل مداحوں کو ایسا لگتا تھا کہ عثمان خالد بٹ اور مایا علی کے درمیان رومانوی تعلق قائم ہے اور ایک مداح کی جانب سے شادی کے سوال پر انہوں نے تردید بھی کی تھی۔