Dawn News Television

شائع 20 مئ 2023 07:35pm

ٹوئٹر پر وائس میسیج بھیجنا ممکن

مائکرو بلاگنگ ویب سائٹ ٹوئٹر نے مخصوص ممالک میں وائس میسیج کا فیچر متعارف کرائے جانے کے دو سال بعد اب اسے دنیا بھر کے صارفین کے لیے پیش کردیا۔

ٹوئٹر پر ابتدائی طور پر برازیل اور جاپان میں 2020 کے اختتام پر وائس میسیج کا فیچر پیش کیا گیا تھا، جس کے بعد فروری 2021 میں اسے بھارت میں بھی آزمائش کے لیے متعارف کرایا گیا تھا۔

پلیٹ فارم کی جانب سے گزشتہ تین سال کے دوران وائس میسیج کی آزمائش دیگر متعدد ممالک میں بھی کی جا رہی تھی اور پاکستان میں بھی بعض صارفین کو مذکورہ فیچر پر رسائی تھی۔

لیکن 19 مئی کو ٹوئٹر کی جانب سے وائس میسیج کو تمام اینڈرائیڈ اور آئی او ایس صارفین کے لیے پیش کردیا گیا۔

وائس میسیج بھیجنے کے فیچر کو صرف اور صرف موبائل صارفین استعمال کر سکیں گے، یعنی اسے صرف ایپلی کیشن سے ہی بھیجا جا سکے گا لیکن اسے ڈیسک ٹاپ صارفین سن سکیں گے۔

مذکورہ فیچر کے تحت صارفین ایک منٹ 30 سیکنڈ کا وائس میسیج بھیج سکیں گے اور پیغام کو بھیجنے سے قبل انہیں اپنی وائس کو سننے کا آپشن بھی دیا گیا ہے۔

صارفین اپنے ہی ریکارڈ شدہ میسیج کو سننے کے بعد اگر چاہیں تو کینسل بھی کر سکتے ہیں اور دوبارہ میسیج ریکارڈ کرکے بھیج سکتے ہیں۔

وائس میسیج کو انباکس میں جاکر ریکارڈ کیا جا سکے گا، یعنی صارف کو پیغام بھیجنا ہو ان باکس میں ان کا اکاؤنٹ تلاش کرکے وہاں پیغام بھیجا جا سکتا ہے۔

ٹوئٹر پر وائس میسیج کا فیچر بلکل اسی طرح کام کرتا ہے، جیسے واٹس ایپ یا پھر فیس بک میسیجر پر بھی کام کرتا ہے۔

اگرچہ ٹوئٹر نے وائس میسیج کے فیچر کو دنیا بھر کے صارفین کے لیے پیش کردیا ہے، تاہم اس باوجود ممکنہ طور پر بعض صارفین کو اس تک رسائی میں مزید کچھ دن لگ سکتے ہیں۔

Read Comments