واٹس ایپ اسٹوریز میں مینشن کرنے اور ری شیئر کرنے کے فیچر کی آزمائش
انسٹنٹ میسیجنگ ایپلی کیشن واٹس ایپ پر اب تک کے اسٹوریز سے متعلق بہترین فیچر کی آزمائش شروع کردی گئی۔
واٹس ایپ پر محدود صارفین کو اسٹوریز کو ری شیئر کرنے اور اپنی اسٹوریز میں دوسرے افراد کو مینشن کرنے تک رسائی دے دی گئی۔
واٹس ایپ اپڈیٹس پر نظر رکھنے والی ویب سائٹ کے مطابق ایپلی کیشن پر اسٹوریز کے اندر اپنے من پسند افراد کو مینشن کرنے سمیت اسٹوریز کو ری شیئر کرنے کے فیچر کی آزمائش شروع کردی گئی۔
فیچر کے تحت صارف اسٹوری کو شیئر کرتے وقت چاہے تو اپنے من پسند فرد کو اس میں مینشن بھی کر سکے گا۔
یہ واضح نہیں ہے کہ ایک اسٹوری میں صارف بیک وقت کتنے صارفین کو مینشن کرنے کے اہل ہوگا، تاہم ممکنہ طور پر ایک وقت میں صرف دو یا تین افراد کو مینشن کرنے کی اجازت ہوگی۔
فیچر کے تحت اسٹوریز میں جن افراد کو مینشن کیا جائے گا، انہیں اسٹوری شیئر ہوتے ہی واٹس ایپ میسیج کے ذریعے نوٹی فکیشن چلا جائے گا۔
اسی طرح جس صارف کو اسٹوری میں مینشن کیا جائے گا، وہ مذکورہ اسٹوری کو ری شیئر بھی کر سکےگا اور وہ بھی ری شیئر کردہ اسٹوری میں کسی دوسرے شخص کو بھی مینشن کرنے کے اہل ہوگا۔
ابھی یہ واضح نہیں ہے کہ مذکورہ فیچر کو کب تک پیش کیا جائے گا، تاہم اس کی آزمائش شروع کردی گئی اور ممکنہ طور پر اسے آئندہ چند ماہ میں پیش کردیا جائے گا۔